*Königsallee er glæsileg verzlunar- og rápgata með fjölda góðra verzlana, veitinga- og kaffihúsum.  Hún liggur báðum megin gamla borgarsíkisins frá Graf Adolfstorgi norður að hallargarðinum.  Vestar, samhliða Königsallee, liggur Breiðgata með bönkum og skrifstofubyggingum stórra iðnfyrirtækja og Heinrich Heine Alle, þar sem stendur fyrsta háhýsið, sem var byggt í Þýzkalandi.  Það er kallað Wilhelm-Marx-húsið og var byggt á árunum 1924-26.  Óperan er lengra til hægri og til vinstri er listahöllin með skiptisýningum.  Á bak við listahöllina er Andreaskirkjan í barokstíl.

Austan Königsallee er breiðgatan Berliner Allee.  Þar standa byggingar verzlunarráðs, Iðnráðs og kauphöllin.  Við Jan-Wellemtorg er 26 hæða Thyssenháhýsið og litlu austar er nýja leikhúsið.

Í hallargarðinum, sem var gerður 1767 stendur Veiðihöllin (Jagdhof; 1752-63).  Hún hýsir listasafn Nordrhein-Westfalen, m.a. Paul-Klee postulínssafnið, sem geymir gamla Meissengripi.  Málarakassinn, hús Félags listamanna, er þarna í grenndinni.  Goethesafnið er í húsi nr. 1 við Jägerhofstrasse.  Norðan hallarinnar er Rochuskirkjan, 28 m há kúpulbygging, sem var endurbyggð árið 1955.

Vestarlega í gamla borgarhlutanum er markaðurinn.  Þar er Ráðhúsið, sem H. Tussmann byggði á árunum 1567-73, og riddarastytta kjörfurstans Johann Wilhelm II, sem G. Grupello steypti árið 1711.  Hetjenssafnið (keramíkgripir) er í Nesselrodehöll, sem er sunnan markaðarins og í Speehöllinni er Borgarsögusafnið.  Menningar- og fræðslumiðstöðin er austar, við Bilkergötu.  Þar er m.a. Heinesafnið og Brúðuleikhús, sem kennt er við Rín.  Enn þá sunnar við Rín er Mannesmannháhýsið (26 hæðir).  Norðan markaðarins er endurbyggð Lambertuskirkjan, upprunalega frá 13.-14. öld.

Vestan gamla borgarhlutans rennur Rín til norðurs undir Oberkasselerbrú.  Sunnan brekkunnar upp í hallargarðinn er Listaakademían.  Þar norður af er Ehrenhof með fjölda bygginga, sem W. Kreis byggði á árunum 1924-26.  Því næst kemur reiðhöllin og *Ríkissafnið (Landesmuseum), sem er kallað Fólk og viðskipti.  Það gefur yfirlit yfir félagslíf og viðskipti um allan heim.  *Listasafnið með listiðnaði, málverkum og höggmyndum frá miðöldum, einkum eftir listmálara borgarinnar á 19. og 20. öld.  Vörusýningasvæðið er 2½ km norðar.  Þar er ráðstefnumiðstöð og Rínarleikvangurinn fyrir 68.000 áhorfendur.  *Japanski garðurinn er í svokölluðum Norður-skemmtigarði.

NÁGRENNI DÜSSELDORF
Benrathhöllin er í Benrathhverfinu, 10 km suðaustan borgarmiðjunnar.  Hún var byggð á árunum 1756-73 í rokokkostíl (N. de Pigage) með fögrum skreytingum innanhúss og garði.

Kaiserswerth er 10 km norðvestan borgarmiðjunnar.  Þar eru rústir Barbarossahallar og klausturkirkjunnar St. Suitbertus (13. öld).

Neanderdalur er 10 km austan borgarinnar.  Þar er forsögulegt safn og dýragarður.

Minidomm er 16 km norðaustan borgarmiðjunnar.  Þar eru líkön sögulegra og nýrra bygginga Þýzkalands