|
 Augsburg í Bæjaralandi
er í 496 m hæð yfir sjó. Íbúafjöldinn
er u.þ.b. 250.000. Augsburg
er þriðja stærsta borg Bæjaralands á eftir München og Nürnberg. Hún er við ármót Lech og Wertach. Augsburg er gömul ríkisborg, sem var aðsetur kaupmannaættanna
Fugger og Welser. Hún er höfuðborg
Svabahéraðs.
Á tímum Rómverja var
borgin tengd Verona með Via Claudia.
Hún var því í þjóðbraut og verzlun og iðnaður döfnuðu.
Aðaliðnaður er tengdur vefnaði og vélsmíði. Háskóli síðan 1970.
Um borgina liggur ein fjölfarnasta ferðamannaleið Þýzkalands,
Rómantíska leiðin, sem liggur frá Würzburg í Maindalnum um
Augsburg til Füssen.
Fyrstu merki byggðar,
þar sem Augsburg er nú, voru herbúðir Drúsusar frá því 15 f.Kr.
Á 1. öld hét byggðin Augusta Vindelicorum og var höfuðborg
Rätienfylkis. Skömmu
eftir 400 hurfu Rómverjar brott.
Augsburg varð snemma
biskupssetur. Árið 955
braut Otto I Ungverja á bak aftur í orrust-unni á Lechvöllum sunnan
borgarinnar. Á 10. öld
byggðist upp bær sunnan biskupsborgarinnar.
Smám saman varð bærinn að borg (á 11.öld) og árið 1276
veitti Rúdolf af Habsburg henni réttindi ríkisborgar.
Virkisveggir og turnar vernduðu hina vaxandi borg, sem lifði blómaskeið
sitt á 15. og 16. öld vegna hagstæðrar legu sinnar við samgönguleiðir
til Suður-Þýzkalands, Ítalíu og þar með Asíu.
Fugger og Welser voru
einhverjir ríkustu kaupmenn heims á sínum tíma.
Mörg ríkisþing voru
haldin í borginni. Á þinginu
1530 afhentu furstarnir Karli V keisara Augsburgarjátninguna,
sem var grundvallarviðurkenning á lútersku kirkjunni.
Þrjátíu ára stríðið
olli viðskiptalegum og menningarlegum afturkipp.
Árið 1805 missti Augsburg ríkisborgarréttindin og 1806 varð
hún hluti hins nýja konungsríkis Bæjaralands.
Með iðnbyltingunni hófst
annað blómaskeið borgarinnar.
Í seinni heimsstyrjöldinni
eyðilagðist helmingur Augsburg.
Árið 1972 stækkaði
borgarsvæðið mikið við innlimun nágrannahreppa.
Skoðunarverðir
staðir
Ráðhúsið
(1615-20; endurreisnarstíll), Fuggerei (lokuð borg í borginni með 4
hliðum; fyrir fátæka borgara. Þeir
borga enn þá sömu leigu og í upphafi 2,5 herbergja íbúð, DM 1,71
á ári), dómkirkjan (9.-14.öld), íbúðarhús Rúdolfs Diesels (smíðaði
díselvélina 1892), Mozarthúsið (Leopold Mozart, faðir Amadeus, fæddist
þar).
Fuggerei.
Félagslegar íbúðir, hinar elztu í heimi, sem Jakob Fugger hinn ríki og
bræður hans létu byggja fyrir fátækt og skuldlaust fólk árið 1516.
Íbúðirnar eru 147 í 67 húsum og þeim fylgir kirkja og brunnur.
Ársleigan samsvarar einu rínísku gyllini (u.þ.b. u.þ.b. ein evra
2005). Bræðurnir voru meðal ríkustu kaupmanna og mestu
áhrifamanna Evrópu á sínum tíma og lánuðu konungum og furstum peninga.
Fuggereisafnið er opið frá 1. marz til 23. desember ár hvert og lokað
í janúar og febrúar. |
