Hualien er höfuðborg samnefnds héraðs á miðri eyjunni austanverðri.  Miðfjallgarðurinn er höfuðprýði þessa svæðis og þarna búa u.þ.b. 80.000 frumbyggjar.  Borgin sjálf er miðstöð marmaraiðnaðarins á Taiwan og mikilvæg samgöngumiðstöð með nútímahöfn.

Í einni marmaraverksmiðjunni er hægt að fylgjast með vinnslu þessa myndbreytta kalksteins.

Nokkrum km sunnar er þjóðsöguþorpið Toulan, þar sem afkomendur Amiættkvíslarinnar sýna fólki menningu sína (dansa, söng og búninga).  Það er líka gaman að skoða 'Suðursjávargarðinn'.

Skoðunarferð frá Hualien meðfram Austurströndinni til fiskibæjarins Suao á Norðurströndinni er mjög hrífandi.  Á leiðinni eru margir þverbrattir sjávarklettar og annað fallegt í landslaginu.Einn hápunkta heimsóknar til Taiwan er ferð frá Hualien til Tungshih um þjóðveg nr. 8 (Cross Island Highway), sem er 193 km langur og var lokið árið 1960.  Lagning þessarar mikilvægu samgönguæðar, sem liggur um stórkostlegt landsvæði (Regnbogi fjársjóðseyjunnar), kostaði 450 verkamenn lífið.

Vegurinn liggur um hið 19 km langa og stórkostlega *Tarokogljúfur, sem vatnið hefur sorfið út úr myndbreyttum kalklögum (m.a. marmara).  Við vegagerðina í gljúfrinu varð að grafa 38 göng.  Á leiðinni í gegnum það ætti fólk að líta á Marmarabrúna, Hof hins eilífa vors og stað, þar sem marmarahellur liggja í hrúgum eins og upphrúgaður skriðjökull.

Við efri enda gljúfursins er hinn friðsæli heilsubótarstaður Tienshiang (450 m; hótel, farfuglaheimili).  Þaðan er hægt að komast að hofi og pagódu um háa hengibrú.  Vestar, í Tayuling, er hliðarvegur, sem liggur að Hohuanshanfjöllum (fjallgöngur, skíðasvæði; hæst 3244 m) niður til Wushe og áfram að Sóltunglvatni'.  Hverabaðsbærinn Lushan er 6 km frá Wushe.

Norðaustan Tayuling er heilsubótarstaðurinn Lishan með stóru hóteli í klassískum, kíverskum hallarstíl.

Vegurinn liggur niður á við til vesturs, fram hjá uppistöðulónunum Techi og Kukuan, um stórar bananaekrur til Tungshih.

Taichung er mikilvægasta borgin á Mið-Taiwan.  Þar er manngerð höfn, sem er meðal 10 mestu verkfræðiafreka eyjarskeggja.  Kínverjar frá meginlandinu stofnuðu þessa borg árið 1721 og skírðu hana Tatun (Stórhóll).  Nú er hún þriðja stærsta borg landsins.  Þegar Japanar komu til Taiwan árið 1895 var nafni hennar breytt í Taichung og hún varð ein mikilvægasta borg eyjarinnar.  Þegar hafskipahöfnin 26 km vestar var tekin í notkun jókst gildi hennar enn.  Tíu akreina hraðbraut tengir Taichung við höfnina.

Tákn borgarinnar er hið 26,8 m háa Búddalíkneski, eitt hið stærsta í Taiwan.  Inni í líkneskinu eru mörg herbergi, þ.á.m. lítið bókasafn.

Í nágrenni Taichung er Pao-Chuehofið með klukkuturni og Búddalíkneski og kristilegi Tunghaiháskólinn, byggður í austrænum stíl, og Lucekapellan, sem arkitektinn Ieoh Ming Pei hannaði.

Tíu km sunnan Taichung er héraðsráðhúsið í Wufeng og utan bæjarins er risavaxið Búddalíkneski (21,8 m).  Stórir steindrekar varða veginn að því.

Þorpið Chunghsingsintsun, 25 km sunnan Taichung, er setur héraðsstjórnar Taiwan.  Tíu km sunnar, við Yuanlin, er stærsti *rósagarður Taiwan.

Hinn 2488 ha stóri heilsubótargarður í Chitou, sem er í umsjá þjóðarháskólans, er 80 km sunnan Taichung.  Þar vex einkum bambus en inni í bambusskóginum er 2800 ára gamalt og 46 m hátt kýprustré, sem margir innfæddir álíta heilagt.

Við Changhua, 19 km suðvestan Taichung, er 21,8 m hátt Búddalíkneski á fjallstoppi, sem dregur til sín fjölda pílagríma.  Sökkull styttunnar (4,2 m) er þakinn lótusblómum.

*Sóltunglvatnið (Jihyuetan), 70 km suðaustan Taichung, er í ægifögru landslagi með fjölda heilsubótarstaða, frumbyggjaþorpi og nokkrum hofum.  Skammt frá suðurströnd vatnsins er 'Hsuan-Chang-hofið', þar sem helgidómar þessa fræga munks eru varðveittir.  Hsuan-Chang flutti með sér Búddahandrit til Kína frá Indlandi á dögum Tanghöfðingjaættarinnar og stuðlaði þannig að útbreiðslu Búddatrúar í Kína.  Skammt sunnar gnæfir hin háa T'zu-En-pagóda.

Fimmtán km norðaustan Sóltunglvatni er skógi vaxið heilsubótarsvæði þar sem er landfræðileg miðja Taiwaneyju.  Þar, í grennd við bæinn Puli, er stór fiðrildagarður.  Yfir hann er spennt risavaxið net til þess að þau sleppi ekki.

Heilsubótarsvæðið *Alishan, í samnefndu fjalllendi, er eitthvert hið fegursta á Taiwan.  Það er sérstaklega fallegt að koma með fjallalestinni frá Chiai, sem Japanar lögðu árið 1912.  Brautarsporið er 72 km langt og liggur um hitabeltissvæði, alla leið upp í svalara loftslag fjallaþorpsins Alishan í 2190 m hæð yfir sjó.  Á leiðinni eru 80 brýr og 50 göng.  Lestin stanzar venjulega við Heilaga tréð, 3000 ára gamalt kýprustré, sem varð fyrir eldingu árið 1947.  Það er rúmlega 18 m hátt og hefur 14,6 m ummál.  Uppi í Alishan ganga enn þá nokkrar gufueimreiðar, sem koma hjörtum járnbrautaáhugamanna til að slá hraðar.

Í Alishan eru góðir gistimöguleikar.  Þar lítið safn, grasagarður, hið rómantíska Tveggjasystravatn og Þriggjakynslóðatréð.  Margir leggja leið sína upp á útsýnispallinn á Chu-fjalli til að fá sýn yfir skýjahafið í Yushanfjallgarðinum (Jaðefjöllum; hæsti tindur: 3997 m) eða upplifa sólarupprásina þaðan.

Tainan (600þ. íb.), borg hinna 100 hofa (209 núna), er elzta borg Taiwan.  Hún var höfuðborg eyjarinnar  frá 1684-1887.  Saga hennar er nátengd nafninu Cheng Cheng-kung (Koxinga), kínversku hetjunni, sem hrakti hollenzku nýlenduherrana á brott.

Skoðunarverðir staðir:  Cheng-Cheng-kung-hofið, kínverskar hofbyggingar með mynd af hetjunni í aðalsalnum.  Við hliðina á því er byggðasafn.  Skammt norðaustar er elzta Konfúsíusarhof landsins.  Hershöfðinginn Chen Yung-hua, fylgjandi Koxinga, lét byggja það á 17. öld.  Það var nýlega endurbyggt af mikilli natni.  Chihkan-turninn, aðeins norðar, var byggður árið 1875 á rústum hollenzka virkisins Providentia, sem hrundi í jarðskjálfta árið 1862.  Við virkismúr, gegnt innganginum, eru steinskjaldbökur og minnismerki með kínverskum táknum og myndletri.  Providentiavirkið var upprunalega tengt Zeelandiavirkinu við Anping með neðanjarðargöngum.  Múrar þess voru byggðir úr hollenzkum múrsteini og þar dó Koxinga árið 1662.

Í Kai-Yuan-hofinu, sem er einn elzti Búddahelgidómur eyjarinnar, er stytta af hinni þúsundarma gyðju miskunnar og skríni kvennanna fimm (þær frömdu sjálfsmorð, þegar síðasta  Mingvirkið féll í hendur Qingættarinnar árið 1683).

Hverasvæðið og heilsubótarstaðurinn Kuantzeling í næsta nágrenni Tainan er heimsóknar virði.  Þar byggðu Frakkar virkin Yi Tsai og Lu Erh Men og þar lenti Koxinga árið 1661.

U.þ.b. 30 km norðaustan Tainan er Kórallavatn (Wushantou-lónið) með rúmlega 100 litlum eyjum og skerjum.  Umhverfis vatnið eru margir heilsubótarstaðir og boðið er upp á bátsferðir um það.

Kaohsiung er á Suðvesturströnd Taiwan.  Þar er stærsta höfn landsins og hún er höfuðborg samnefnds héraðs.  Þar er stærsta niðurrifsstöð skipa, næststærsti slippur landsins og fimmta stærsta gámastöðin.  Þarna er líka fjöldi iðnfyrirtækja, sem flytja út framleiðslu sína og þar er líka annar alþjóðaflugvöllur landsins.

Skoðunarvert:  Búddahof konunga fjallgarðanna þriggja, taóhofið 'Wen-Wu og Þriggjafönixahöllin, þar sem leikmenn spila tónlist.  Ofan af Shou-shan (Langlífisfjalli; Píslarvottahofið) er stórkostlegt útsýni.  Konfúsíushofið, sem lokið var 1976 og er hið nútímalegasta á Taiwan, Vor- og haustgarðskálarnir við flotastöðina Tsoying, Tígris- og drekapagódurnar og fallegar lótustjörnin eru athyglisverð.

Tíu km utan Kaohsiung er vatnasvæðið Cheng-Ching.  Þar er fjöldi áhugaverðra staða, s.s. hlykkjótt brú fyrir elskendur, þrír garðskálar, *Chung-Hsingpagódan (eitt þekktasta tákn Taiwan), tunglskálinn og orkideustígur.  Hjá pagódunni er golfklúbbur. 

Syðsti hluti Taiwan, sem er girtur kóralrifjum, liggur að mestu undir *Kentingþjóðgarðinn, sem nær líka alllangt í sjó fram.  Syðst er heilsubótarbærinn Oluanpi, þar sem forsögulegar minjar um búsetu fundust fyrir skömmu.  Frá vita bæjarins, sem reistur var 1882, sést í góðu skyggni alla leið yfir Bashisund til Filipseyja.  Baðstrendurnar í nágrenninu eru upplagðar til baða, köfunar og skeljasöfnunar en fólk þarf að gæta sín á sæslöngum, sem fela sig í klettum og kóralrifjum fyrir ströndinni.

Hinn 18 m hái og 35 m breiði *kórallaklettur Chuan Fan Hsih fyrir ströndinni á miðri leið milli Oluanpi og Kenting er sérkennileg náttúrusmíð.  Kentingskógargarðurinn er þar í grennd.  Upphaf hans var grasagarður, sem gerður árið 1906.  Þarna eru rúmlega 1200 plöntutegundir til sýnis auk kórallasúlna af hafsbotni.

Fáum km sunnan bæjarins Hengchun er Lugluan-vatnið, 175 ha að flatarmáli og 3,5 m djúpt.  Það er urmull af fiski í því og hundruð þúsunda farfugla hafa þar vetursetu.

Alls staðar meðfram Suðurströnd Taiwan er alls konar hitabeltisgróður, sem hefur vaxið upp af fræjum frá suðlægari eyjum og löndum.

Japanar byggðu upp hverabaðstaðinn Chihpen á Suðausturströndinni, 15 km suðvestan hafnarborgarinnar Taitung.