Hamah er borg í miðvesturhluta Sýrlands við Orontesána.  Helztu framleiðsluvörur borgarinnar og nágrannasvæðanna eru korn og ullar-, silki- og baðmullardúkur.  Þessarar borgar er oft getið í biblíunni sem Hamath og hún var fyrrum mikilvæg miðstöð hittíta.

Í febrúar 1982 var þar gerð uppreisn gegn ríkisstjórninni undir forystu múslimska bræðralagsins.  Þar féllu líklega 5000 manns, þegar stjórnarherinn bældi uppreisnina niður.  Áætlaður íbúafjöldi árið 1994 var 273 þúsund.