Thun, í kantónunni Bern er í 565 m hæð yfir sjó.  Íbúafjöldinn er u.þ.b. 33.000.  Þessi forna borg hefur tilheyrt Bern frá 1384.  Hún er við útfall Aare úr Thunervatni á báðum bökkum í mjög fögru umhverfi.  Schloßberg (30 m hærra) gnæfir yfir bæinn, sem má kalla hliðið að Berner-Oberland (hálendinu).  Gönguleiðir meðfram aðalgötunni eru blómum skreyttar, bæði uppi yfir verzlununum og í súlnagöngum meðfram þeim.  Thunervatnið er 48 km² í 560 m hæð, 18 km langt, 2-2,8 km breitt og mest 217 m djúpt. Það er í Aaredal ásamt Brienzervatni, sem er 29 km² í 576 m hæð, 14 km langt, 2-2,5 km breitt og mest 259 m djúpt.  Vegir eru meðfram Thunervatni að norðan og sunnan.  Vatnið í þeim báðum er ljósgrænt að lit.  Upprunalega var aðeins eitt vatn, sem hefur fyllzt upp í miðju af árframburði, þar sem Interlaken stendur.  Bæði vötnin saman eru nefnd Oberländervötn.