Bern, höfuðborg Sviss og næststærstu kantónunnar, Bern, er í 540 m hæð yfir sjó.  Íbúafjöldinn er u.þ.b. 150.000.

Yfir háskólaborginni Bern gnæfir dómkirkjan Münster í gamla borgarhlutanum, sem er á sandsteinshrygg með ána Aare á báðar hliðar og háar brýr tengja hann nýrri hverfum.  Gamli hlutinn er að nokkru leyti í upprunalegri mynd.  Húsin, með framsettum þökum og súlnagöngum (alls 6 km löng), bera vott um velmegun borgaranna á 18. öld.  Flestir hinna líflegu og litríku brunna eru frá 1540-45 (eftir Hans Gieng).  Borgin byggist á iðnaði (vefnaður, vélar, súkkulaði, lyf, matvæli, prentun, rafeindatæki o.fl. og verzlun (mest landbúnaðarafurðir).

Líklega stofnaði Berthold I, hertogi af Zähringenætt, borgina árið 1191.  Þegar hún var gengin fyrir ætternisstapa gaf Friðrik II, keisari, borginni sjálfstæði.  Í orrustunni við Laupen sigruðu borgarbúar undir stjórn Rudolfs von Erlach Búrgúndsaðalinn.  Árið 1353 gekk Bern í eiðveldið.  Siðbótin kom árið 1528.  Þing og ríkisráð hefur setið í Bern síðan 1848.  Alþjóðapóstsamtökin hafa haft þar aðsetur síðan 1874 og alþjóðleg samtök um járnbrautasamgöngur síðan 1893.  Við háskólann í Bern er deild, sem leggur áherzlu á tölfræðilegar athuganir á ferðaþjónustunni.

Skoðunarverðir staðir
*Kleine Schanze (útsýnisskífa),
*Münster (síðgotn.),
*Listasafnið,
*Sögusafn Bern,
*Svissneska Alpasafnið.