Murcia er höfuðborg samnefndrar sýslu í sjálfstæðs stjórnsýsluhéraðs á Suðaustur-Spáni.  Hún er við ármót segura og Guadalentín-ánna á frjósömu áveitusvæði (huerta = aldingarðaland) norðaustan Granadaborgar.  Þetta landsvæði var byggt, þegar Rómverjar lögðu Suður-Spán undir sig á 3. öld f.Kr., en nafn þess er ókunnugt, þótt sumir tengi það við rómversku borgina Vergilia.  Márískar heimildir geta um nafnið Mursiyah.  Arabíski landfræðingurinn Yaqut hélt því fram, að furstinn (emírinn) af Córdoba, ‘Abd ar-Rahman II, hefði stofnað borgina árið 825 og gert hana héraðshöfuðborg.  Eftir fall Kalífaríkisins Córdoba 1031, féll Murcia undir stjórn Almería og síðar Valencia til 1063, þegar stjórnandi hennar, ‘Abd ar-Rahman ibn T ahir, lýsti Murcia sjálfstætt konungsríki.

Seguraáin skiptir borginni.  Norðan hennar er gamli borgarhlutinn og hinir nýlegri sunnan hennar.  Gotneska dómkirkjan Santa María (14. öld) var endurbyggð á 18. öld.  Þar er fögur kapella kennd við Vélezfjölskylduna (1507).  Í Jesúsklaustrinu (Ermita de Jesús) er mestur hluti höggmynda Francisco Salcillo, sem laða að sér fjölda gesta í Heilögu vikunni.  Murciaháskólinn var stofnaður árið 1915.

Murcia er miðstöð flutninga og landbúnaðar.  Hveiti er unnið í borginni.  Silkiiðnaður borgarinnar, allt frá márískum tíma, er enn þá virkur.  Verksmiðjur borgarinnar framleiða m.a. ullarvöru, hördúk og baðmullarvöru, saltpétur, leður, álvöru, húsgögn og höfuðföt.  Áætlaður íbúafjöldi árið 1998 var tæplega 350 þúsund.