|
 Hafnarborgin Málaga
er höfuðborg samnefndrar sýslu í sjálfstjórnarhéraðinu Andalúsíu á
Suður-Spáni. Hún er við breiðan flóa við Miðjarðarhafið við ósa
Guadalmedina á miðri Costa del Sol. Fönikíumenn stofnuðu borgina á 12.
öld f.Kr. en í spor þeirra komu Rómverjar og vísigotar þar til márar
lögðu Málaga undir sig árið 711. Undir stjórn þeirra varð hún að einni
mikilvægustu borg Andalúsíu. Þegar Córdoba-kalífaríkið leystist upp,
var konungsríkið Málaga stofnað undir stjórn fursta (emíra), sem kölluðu
borgina „Himneska paradís”. Eftir nokkrar misheppnaðar tilraunir tóku
kristnir borgina 19. ágúst 1487.
Áin
Guadalmedina, sem rennur um Málaga frá norðri til suðurs, olli tíðum
flóðatjónum áður en stíflan var reist við Agujero. Yfir borginni
gnæfir hæðin Gibralfaro (170m) með fornu arabísku virki. Í miðri
gömlu borginni var hafizt handa við byggingu dómkirkjunnar árið 1528 á
grunni mosku. Lokið
var við byggingu innandyra og annars turnsins árið 1782 en hinn vantar
enn þá. Aðrar helztu kirkjur eru
Santo Cristo de la Salud, Sagrario og Victoria, sem er kunn fyrir
drungalegar skreytingar á grafhýsi furstanna af Luna. Héraðslistasafnið
á safn 17. aldar meistaraverka auk nútímaverka, þ.á.m. Pablo Picasso,
sem fæddist í borginni í húsi nr. 16 við Plaza de la Merced. Máríski
kastalinn, Alcazaba, hefur verið endurbyggður sem safn og
almenningsgarður en Gibralfaro-virkið er ósnert.
Málaga er næstmikilvægasta hafnarborg Spánar við
Miðjarðarhafið eftir Barcelona.
Útflutningsvöru, sem fara um höfnina, eru aðallega járngrýti, þurrkaðir
ávextir, möndlur, ólífuolía, appelsínur, sítrónur, ólífur, niðursoðnar
ansjóvíur, járn og stál. Verksmiðjur borgarinnar framleiða
byggingarefni, efnavöru, járn og stál og vinna úr landbúnaðarafurðum (maís).
Þarna eru einnig ölgerðir, áburðarverksmiðjur, vefnaðarmyllur og
olíuleiðslur til hreinsunarstöðvarinnar við Puertollano.
Milt loftslagið í Málaga ræðst af skjólinu af nærliggjandi
fjöllum og laðar að ferðamenn. Í grennd borgarinnar er fjöldi frábærra
sandstranda, s.s. Marbella og Fuengirola,
þar sem furutrén vaxa alla leið niður í fjöru. Áætlaður íbúafjöldi árið
1982 var rúmlega 450 þúsund. |
