Tenerife (2053 km²) er stærsta eyja Kanaríeyjaklasans.  Hún er rómuð fyrir fegurð.  Um miðbik hennar teygist fjallgarður með breiðum og fjrósömum dölum.  Orotava og Gülmardalirnir eru nefndir fyrstir hvað fegurð snertir.  Hæsti tindur eyjarinnar og þar með Spánar, Pico de Teide (2718m), gnæfir upp úr hásléttunni Cañadas.  Flóra eyjarinnar er fjölbreytt og sendnar víkur strandlengjunnar eru aðskildar með klettahöfðum.

Santa Cruz de Tenerife er höfuðastaður eyjarinnar og héraðsins.  Hún er prýdd fögrum görðum eins og García Sanagría, bæjargarðinum.  Á torginu Plaza de España niðri við höfnina er iðandi mannlíf og minnismerki um þá, sem féllu í borgarastríðinu.  Vestan þess er torgið Plaza de la Candelaria með styttu af verndardýrlingi eyjarinnar Madonna de la Candelaria frá 1778.  Norðar er San Fransisco kirkjan (1680) með fögur háaltari og freskum í lofti.  Vestan hennar er Borgarsafnið með verkum margra meistara, þ.á.m. innlendum.  Frá torginu Plaza del Principe er gengið eftir Calle del Pilar að Frúarkirkjunni (Nuestra Señora del Pilar; 18.öld) með styttu af Virgen de las Angustias (1804).  Sé gengið eftir Avenida de Anaga frá Spánartorgi og meðfram höfninni er komið að virkinu Castillo de Paso Alto, þar sem er nú safn með herfangi, vopnum og einkennisbúningum.

La Laguna (550m), næstmikilvægasti bær eyjarinnar, er 9 km norðvestan Santa Cruz.  La Laguna var fyrrum höfuðstaður en er nú biskupssetur og háskólabær.  Dómkirkjan (16.öld) geymir fagra útskorna muni og málverk.  Elzta kirkjan, La Concepción (1502), er vernduð.  Mörg gömul hús, sem aðalsmenn bjuggu í, eru með hefðbundnum svölum.  Gróðurinn í hlíðum nærliggjandi fjalls, Las Mercedes er einkar áhuga- og athyglisverður.  Vegalengdin frá La Laguna um Bosque de la Esperanza til Las Cañadas (Parador) er 58 km.  Sumir kjósa að fara með togbrautum upp á Pico de Teide en aðrir ganga.

*Puerto de la Cruz er mesti ferðamannastaður eyjarinnar, enda góðar baðstrendur allt um kring.  San Telmo kirkjan (1626) er áhugaverð og tákn bæjarins.  Þar stendur eftirmynd af verndardýrlingi fiskimanna.  Kirkjan Nuestra Señora de la peña (17.öld) geymir fjölda listaverka frá baroktímanum, s.s. háaltarið eftir Luis de la Cruz.  Hinn kunni grasagarður er við veginn til Orotava.  Þar eru tré og plöntur frá öllum heimshornum.  Sex km lengra er La Orotava (600m) í undurfögrum og heillandi, samnefndum dal.  Í bænum er fjöldi íbúðarhúsa með svölum og La Concepción kirkjan með barokforhlið.  Í Casas de los Balcones (17.öld) er listiðnaðarsafn.  Leiðin frá La Orotava í suðvestur til nágrannabæjarins Los Realejos liggur um akra og bananaekrur.  Í kirkjunni Nuestra Señora de la Concepción er frábært barokaltari og sóknarkirkjan Santiago (1498) er hin elzta á eyjunni.  Sé haldið áfram austurstrandveginn til Icod (250m) við rætur Teide, er hægt að finna þúsund ára gamalt drekatré í bænum.  Kirkjan San Marcos er prýdd endurreisnarforhlið og barokaltari.  Aðeins lengra er litli hafnarbærinn Garachico, Perlan við hafið.  Þar er virkið Castillo de San Miguel og baðstaður.  Los Cristianos er fallegur strandbær á suðurhluta eyjarinnar með frábærri strönd og hótelum.