Árið 1992 var íbúafjöldi landsins 21.206.800 (49 manns á hvern km²).  Úzbekar, sem eru tyrkneskumælandi múslimar, eru 71% þjóðarinnar.  Rússar koma næstir með 8,3% og líkt og í öðrum fyrrverandi Sovétlýðveldum, hefur Rússum fækkað, því þúsundir þeirra hafa flutzt til Rússlands eða annað.  Tadjíkar eru 4,7%, Kazakar 4,1% og síðan koma tatarar, Karakalpakar, Kóreumenn, Kyrgyzar, Úkraínumenn, Turkmenar og Tyrkir.  Rússarnir bjuggu næstum eingöngu í Toshkent og öðrum iðnaðarborgum.  Tadjikar búa aðallega í hinum fornu borgum Bukhoro og Samarqand.  Karakalpakar búa aðallega í sínu, samnefnda heimastjórarlýðveldi.

Flestir íbúar landsins (>60%) búa í dreifbýli.  Tashkent, höfuðborg landsins (2,1 miljón íbúa 1992), er stærsta borg Mið-Asíu.  Flestar aðrar helztu borgir landsins eru í austurhlutanum, s.s. Samarqand, Namangan, Andijon og Bukhoro.  Fólksfjölgunin nemur u.þ.b. 3,5% á ári.  Heilbrigðismál eru í ólestri, þannig að barnadauði er mikill og margir deyja úr læknanlegum sjúkdómum.  Meðallífslíkur eru 65 ár.  Þornun Aralvatnsins hefur valdið geysilegum skorti á drykkjarvatni, sem síðan leiddi til æ bágara heilsufars íbúanna í vesturhluta landsins.