Bukhoro (Bokhara eða Bukhara), höfuðborg samnefnds héraðs í Vestur-Úzbekistan, stendur í vin við ána Zeravshan.  Hún selur náttúrulegt gas, baðmull, ávexti og silki og framleiðir vefnaðarvöru, teppi og fatnað auk þess að súta astrakhan-skinn.  Þarna eru margar sögulegar minjar, s.s. hús frá 9. öld, nokkrar moskur, Arkarvirkið (nú safn) og grafhýsi Ismail Samani (9.-10. öld) og kennaraskóli.

Borgarinnar er getið á 1. öld, þegar hún var mikilvægur menningar- og verzlunarstaður.  Snemma á 8. öld náðu arabar yfirhendinni.  Hún var meðal forystuborga islamskra fræða á valdatíma araba og persnesku höfðingjaættarinnar Samanid, sem réði borginni á 9. og 10. öld.  Qarakhanídar og tatarar réðu henni síðar og árið 1555 varð hún höfuðborg emírsins í Úzbekistan.  Rússar lögðu ríki emírsins undir sig  árið 1866 og héldu því sem verndarsvæði á árunum 1868-1920, þegar emírnum var steypt af stóli og ríkið var gert að Sovétlýðveldinu Bukhoro.  Á árunum 1924-1991 tilheyrði borgin Sovétlýðveldinu Úzbekistan, sem fékk sjálfstæði 1991 við hrun kommúnismans.  Áætlaður íbúafjöldi árið 1989 var 224 þúsund.