Zaporizhzhya (Zaporozhye) er höfuðborg samnefnds héraðs við Dneprána í Suðaustur-Úkraínu.  Hún er mikilvæg miðstöð járnbrauta og umskipunar í Donets’k kolalægðinni og mikil iðnaðarborg.  Borgarbúar framleiða m.a. ál, mangan, járn og stál, farartæki, efnavöru og landbúnaðarvélar.  Hin stóra vatnsaflsvirkjun Dneproges, sem var byggð árið 1932 og endurbyggð 1947 eftir síðari heimsstyrjöldina, er í borginni.  Þar eru einnig læknaskóli og verkfræðiskóli.  Árið 1770 var byggt virki á borgarstæðinu og borgin óx umhverfis það.  Hún var þekkt undir nafninu Aleksandrovsk til 1921.  Á nærliggjandi Khortitsaeyju í Dnepránni var Kastali Zaporizhzhya-kósakka á 16. – 18. öld.  Áætlaður íbúafjöldi árið 1991 var tæplega 900 þúsund.