Næstum allt landið er risastór slétta, sem liggur víðast neðan 300 m.y.s.  Karpatafjöll taka við allravestast og á suðurströndinni, á Krímskaga, eru Krímfjöll.  Hæsta fjall landsins er Hoverla í Karpatafjöllum (2061m).  Flestar meginmóður landsins renna til suðurs í Svartahaf (Dnepr, Bug og Dnestr).  Vestur-Bug rennur til norðurs um vesturhlutann til Vislu, sem stemmir að Eystrasalti.  Tveir þriðjungar landsins, mið- og suðurhlutarnir, eru þaktir svörtum og afarfrjósömum jarðvegi.Úkraína hefur temprað meginlandsloftslag og Miðjarðarhafsloftslag á suðurhluta Krímskaga.  Meðalmánaðarhitinn á veturna er á bilinu -8°C til 2°C en sumarhitinn 17°C til 25°C.  Á suðurströndinni er hitinn oft undir frostmarki á veturna og hafnir landsins eru stundum ísilagðar.  Úrkoman minnkar norðureftir landinu.  Mest er hún í Karpatafjöllum (>1500 mm) og minnst við Svartahafið (<300 mm).

Upprunaleg flóra landsins myndaði þrjú breið belti frá norðri til suðurs.  Nyrzti þriðjungurinn var vaxinn blönduðum skógargróðri, miðþriðjungurinn skógum og steppugróðri og suðurhlutinn.steppugróðri.  Mestur hluti þessa gróðurfars er horfinn vegna ræktunar.  Sama má segja um upprunalegt dýralíf, þótt margar tegundir séu eftir.  Enn þá má finna dádýr, bjór og mörð, svarta gamminn (evróasíska tegundin), steppuörninn og gráhegrann.

Landið er auðugt af verðmætum jarðefnum.  Birgðir járngrýtis eru í suðausturhlutanum í grennd við kol og anþrasít í Donetslægðinni (olíusvæði).  Einhverjar auðugustu mangannámur heims eru á Nikopolsvæðinu.  Mestur hluti olíu- og gasbirgða landsins er uppurinn en fyrrum var framleiðslan allt að þriðjungi framleiðslu Sovétríkjanna (eftir 1960), þannig að nú verða Úkraínumenn að flytja inn olíu.  Einnig finnst nokkuð af titan, báxíti, kvikasilfri, steinsalti og brennisteini.