Kherson, höfuðborg samnefnds héraðs, er mikilvæg hafnarborg við ána Dnepr í grennd við Svartahafið.  Meðal þess, sem borgarbúar framleiða, eru skip, olíuvörur, baðmullardúkur og matvæli.  Líklega var þarna grísk nýlenda í fornöld en stjórnvitringurinn Grigory Potemkin stofnaði borgina árið 1778 sem virki og höfn.  Grafhýsi hans er í dómkirkjunni.  Árið 1783 var fyrstu herskipum rússneska Svartahafsflotans hleypt af stokkunum í borginni.  Áætlaður íbúafjöldi árið 1990 var 361 þúsund.