Donets'k, fyrrum Stalino, er höfuðborg samnefnds héraðs við Kalmiusána í Suðaustur-Úkraínu.  Hún er stærsta borgin og mesta miðstöð iðnaðar í Donets’k-lægðinni.  Þar er framleitt járn og stál, efnavörur, vélbúnaður, raftæki og matvæli.  Í Donets’k er symfóníuhljómsveit, opera og nokkrir æðri skólar og rannsóknarstofur.  Borgin þróaðist fyrst í kringum verksmiðjur, sem Skotinn John Hughes fékk að reisa til að framleiða járnbrautaspor árið 1870.  Bærinn var skírður Yuzovka honum til heiðurs.  Vöxtur var mikill í borginni á þriðja áratugi 20. aldar.  Í síðari heimsstyrjöldinni hersátu Þjóðverjar borgina og ollu verulegu tjóni á henni.  Donets’k hét Stalino á árunum 1924-61.  Áætlaður íbúafjöldi árið 1990 var rúmlega 1,1 miljón.