Chernobyl’ er borg í Miðnorður-Úkraínu, u.þ.b. 130 km norðan Kænugarðs (Kiev) og 20 km frá kjarnorkuveri.  Einn kjarnakljúfa þess bilaði með hörmulegum afleiðingum 26. apríl 1986.  Þetta var alvarlegasta slys af þessu tagi, sem gerzt hafði í heiminum.  Ástæður þess voru raktar til ábyrgðalausrar tilraunar með kælikerfi kjarnakljúfsins.  Kælikerfinu var lokað, þannig að kjarninn hitnaði um of og olli gufusprengingu, sem tætti sundur hlífarnar og geislavirkt efni fór í miklu magni út í andrúmsloftið.  Partur af því dreifðist yfir Norður-Evrópu, alla leið til Bretlands.  Samkvæmt tilkynningum frá Sovétríkjunum fórust 31 manns í sprengingunni.  Ekki er ljóst enn þá (2003), hve margir hafa látizt vegna geislavirkninnar.  Rúmlega 100 þúsund manns voru fluttir af svæðinu umhverfis kjarnorkuverið.  Borgin Chernobyl’ og mörg þorp í nágrenni þess hafa verið óbyggð síðan.  Stjórnendur kjarnorkuversins voru dregnir fyrir dóm 1987 og sex þeirra voru sendir í vinnubúðir.  Þrír kjarnakljúfar orkuversins voru farnir að framleiða rafmagn sama ár og svæðið næst því var gert að þjóðgarði.  Árið 1991 lofuðu stjórnvöld í Úkraínu að loka verinu en eftirspurn eftir rafmagni olli töfum á því.  Um mitt ár 1994 gerðu vestræn ríki ráðstafanir til að styrkja Úkraínu nægilega til að hægt væri að loka þessu óörugga kjarnorkuveri.