Heildarflatarmál Armeníu er 29.800 km² á norðaustanverðri Armensku sléttunni, sem er geysistór háslétta alla leið suður að Vanvatni í Tyrklandi.  Landslagseinkenni eru fjöll og hálendi.  Meðalhæð landsins yfir sjó er í kringum 1800 m.  Aragatsfjall (4090m) rís hæst.  Meðal fjallgarða eru Pambak, Gegam, Vardenis og Zangezur, sem eru angar út úr Lægri-Kákasusfjöllum.  Úrkoma er mjög mismikil eftir landshlutum og mest í fjallshlíðum.  Þurrasta svæði landsins er meðfram Arasánni, þar sem meðalársúrkoma er innan við 300 mm.  Þéttriðið net lækja og áa kvíslast um Aras-Kura árlægðina.  Vegna þess, hve landið er fjöllótt, er þar fjöldi fossa og flúða.  Uppi í fjöllum er fjöldi stöðuvatna.  Hið stærsta er Sevanvatn, sem nálgast að vera 90% vatnsbirgða landsins.  Loftslag, jarðvegur og gróður er mismunandi eftir landshlutum.  Jarðvegstegundir eru tvöfalt fleiri en í Evrópuhluta Rússlands.  Flóran skiptist aðallega í háfjalla-, hálfeyðimerkur- og steppugróður, þótt talsvert sé um beyki- og eikarskóga í norðausturhluta landsins.  Meðal villtra dýra má telja villisvín, sjakala, gaupur og sýrlenzka birni.