Aberdeen er aðalviðskipta- og fiskihöfn í Norður-Skotlandi.  Hún er í Grampianhéraði á strönd Norðursjávar milli ánna Don og Dee.  Milli árósa þeirra eru 3 km.

Aberdeen er kölluð Granítborgin vegna þess að flestar hús hennar eru úr dauflituðu graníti, sem er flutt frá námum skammt frá borginni.  Ferhyrndar og traustlegar byggingar Union Street eru flestar frá 19. öld og líklega er Marischalskólinn stærsta graníthús heims (1844).  Mjóar og hlykkjóttar götur gamla borgarhlutans eru norðan Union Street.  Þar eru mörg hús frá 16. öld og nokkur miklu eldri, s.s. St. Macharkirkjan frá 15. öld og King’s College (stofnaður 1494), sem síðar sameinaðist Marischalskólanum í tengslum við stofnun háskólans.

Allt frá því að Norðursjávarolían uppgötvaðist hefur Aberdeen verið miðstöð olíuiðnaðarins og aðalbirgðastöð fyrir olíuborpallana.  Efnahagur borgarinnar hefur blómstað og þess sjást mörg merki.  Heildartekjur hafnarinnar fimmtánfölduðust á „gullgrafaraárunum” og hún hefur verið í stöðugri uppbyggingu og endurnýjun.

Auk fiskveiða má nefna efnaiðnað, áburðarverskmiðju, pappírsframleiðslu, litun, vélaframleiðslu, skipasmíðar, granítvinnslu og fiskvinnslu.

Elzta leyfisbréf borgarinnar er frá 1179.  Samkvæmt konunglegum leyfisbréfum 1489 og 1498 varð Aberdeen að sjálfstæðu bæjarfélagi undir stjórn kirkjunnar.  Árið 1891 var núgildandi leyfi gefið út fyrir borgina.

Sagan.  Hægt er að rekja uppruna hinnar keltnesku kapellu heilags Machar (lézt líklega 594) til 6. aldar.  Dómkirkjan, sem byggð var á grunni hennar, var vígð 1136 en elztu munir kirkjunnar eru frá 14. öld.  Bygging hinnar frægu, gotnesku brúar yfir Don, Brig o’ Balgownie, hófst 1285 og lauk 1320.  Skjöl borgarinnar hafa verið varðveitt næstum óslitið frá 1398.  Mary, drottning Skota, er sögð hafa horft á aftöku frænda sins og aðdáanda, John Gordon, frá íbúðarhúsi Marischal jarls árið 1562.  George Keith, fimmti jarlinn af Marischal, stofnaði Marischal-háskólann 1593.