Dubayy er eitt hinna sjö Sameinuðu arabísku furstadæma og hið næststærsta að íbúafjölda.  Heildarflatarmál þess er 3900 km².  Það er nokkurnveginn ferhyrnt í lögun og 72 km þess liggja að Persaflóa.  Höfuðborgin er Dubayy-borg, sem er stærsta borg bandalagsríkjanna.  Hún er við vík í norðausturhluta landsins.  Rúmlega 90% íbúanna býr í höfuðborginni og nágrenni hennar.  Dubayy er umlukt Abu Dhabi furstadæminu til suðurs og vesturs og ash-Shariqah til austurs og norðausturs.  Al-Hajarayn í Wadi Hattá, 40 km frá næsta yfirráðasvæði Dubayy, tilheyrir furstadæminu.

Kunnungt er um byggð á borgarsvæði Dubayy síðan 1799.  Árið 1820 samþykkti hin ólögráða fursti landsins friðarsamninga við Breta en landið var að mestu undir yfirráðum Abu Dhabi til 1833.  Þá fór hópur Al bu Falasah-fjölskyldunnar af Bani Yas-ættinni, aðallega perlufiskimenn, til Abu Dhabi til að berja á keppinautum sínum og tók Dubayy-borg án mótspyrnu.  Þá varð Dubayy að voldugu ríki á mælikvarða þessa heimshluta og oft sló í brýnu við fyrrum herraþjóðir landsins.  Qawasim-sjóræningjarnir reyndu að ná borginni aftur en furstunum tókst að halda sjálfstæðinu með því að etja nágrannaríkunum saman, þegar mesta hættan steðjaði að.  Dubayy varð aðili að sömu samningum við Breta og hin furstadæmin á svæðinu 

Furstar Dubayy hlúðu að verzlun og viðskiptum ólíkt furstum annarra furstadæma við Persaflóa.  Í upphafi 20. aldar var Dubayy-höfn mikilvæg miðstöð verzlunar.  Fjöldi erlendra kaupmanna, aðallega indverskra, settist þar að.  Fram undir 1930 var borgin kunn vegna perluútflutings.  Á síðari tímum hefur borgin ásamt tvíburaborg sinni, Dayrah, handan víkurinnar, orðið að miðstöð innflutnings vestræns varnings  Flestir bankar og tryggingarfyrirtæki bandalagsríkjanna eiga aðalstöðvar í Dubayy-borg.  Eftir gengisfellingu rúpíunnar 1966 tók landið höndum saman við Qatar um gjaldmiðilsbreytingu og útkoman varð Qatar/Dubayy ríyal.  Árið 1972 tóku öll bandalagsríkin upp sameiginlegan gjaldmiðil, dirham.  Í Dubayy er stunduð fríverzlun með gull og lífleg smyglviðskipti eru í gangi með gullstangir til Indlands, þar sem eru takmarkanir á innflutningi.

Árið 1966 fannst olíulindasvæðið Fath (Fateh eða Fatta) á hafsbotni í Persaflóa í kringum 120 km vestan Dubayy-borgar, þar sem ríkið hafði veitt einkaleyfi til rannsókna og olíuvinnslu.  Á áttunda áratugnum var komið þar fyrir þremur 500 þúsund tunna geymum á hafsbotni.  Þeir eru í laginu eins og kampavínsglös á hvolfi og eru almennt kallaðir Pýramídarnir þrír.  Áætlaðar olíubirgðir landsins eru í kringum tuttugasti hluti birgða nágrannans Abu Dhabi en tekjurnar af olíunni og verzlun hafa gert Dubayy að auðugu ríki.  Síðla á áttunda áratugnum var byggð álverksmiðja og gasstöð í grennd við Dybayy-borg.  Borgin er mjög nútímaleg og utan hennar er millilandaflugvöllur.  Ný hafskipahöfn, Rashid-höfn, var opnuð 1972 og þar er hægt að taka risaolíuskip í slipp síðan 1979.  Dubayy-borg er tengd malbikuðu vegakerfi við Ra’s al-Khayman-borg og Abu Dhabi-borg.  Áætlaður íbúafjöldi borgarinnar 1980 var 270 þúsund og alls í furstadæminu hálf miljón.