Rússneski eyjaklasinn Novosibirskye Ostrova fyrir norðausturströnd Síberíu í Íshafinu markar skilin milli Laptev-hafs og Austur-Síberíuhafs.  Dmitry Laptev-sund skilur hann frá meginlandinu.  Hann er innan Sakha-héraðs í Síberíu.  Eyjan Novaya Sibir er 6200 km² en heildarflatarmál eyjaklasans er u.þ.b. 38.000 km².  Eyjaklasinn skiptist í þrennt:  Syðst eru Lyakhovskye eyjar (Bolshoy Lyakhovskye 4600 km²) og milli þeirra og hinna eyjanna er Sannikova-sund og norðaustast eru smáeyjarnar De Long-eyjar.

Stærsta eyja aðaleyjaklasans er Novaya Sibir og næstar að stærð eru Belkovsky, Kotelny og Faddeyevsky (5000 km²).  Milli hinna tveggja síðarnefndu eyjaklasa er Bunge-eyja, sem er láglend og verður stundum fyrir óvægnum barningi hafsins.  Hæstu staðir þessara eyjaklasa ná allt að 374 m hæð yfir sjó.  Þarna ríkir gríðarkalt heimskautaloftslag og yfirleitt eru þeir þaktir snjó rúmlega níu mánuði ársins.  Þarna er fátæklegur túndrugróður og engin merki um runnagróður.  Víða eru sandflæmi og mýrlendi.  Fuglalífið er fjörugt á sumrin og einu landspendýrin, sem þrífast þarna eru heimskautarefurinn, hreindýr og læmingjar.