Constanta er höfuðstaður samnefnds héraðs við Svartahaf í suðaustanverðri Rúmeníu.  Hún er aðalhafnarborg landsins.  Helztu útflutningsvörurnar, sem um hana fara, eru olía og korn.  Innflutningurinn byggist aðallega á  kolum koksi, vélbúnaði og vefnaðarvöru.  Í fornöld hét borgin Tomis, þar sem rómverska ljóðskáldið Ovidus bjó á elliárum sínum í útlegð og dó.  Á 4. öld fékk hún núverandi nafn til heiðurs systur Konstantíns I keisara.  Á tyrkneskum tímum (1413-1878) hét hún Kustenja en árið 1878 fengu Rúmerar þetta landsvæði frá Búlgörum og breyttu nafninu á ný.  Áætlaður ibúafjöldi 1992 var 350 þúsund.