Landið skiptist náttúrulega í þrjú svæði, mjóa strandsléttu, fjallgarða og hæðir og innsléttuna.  Strandsléttan meðfram Ómanflóa (al-Batinah) er aðallandbúnaðarsvæði landsins.  Grænufjöll (Al Jabal Al Akhdar) eru upp af strandsléttunni.  Þar ná hæstu tindar rúmlega 3000 m hæð.  Strandsléttan teygist suður með Arabíuhafi og er að mestu gróðurlaus, þótt nokkur ræktun sé stunduð á Dhofar-svæðinu allralengst til suðvesturs.  Helztu náttúruauðæfin eru olían en auk hennar finnst líka kopar, asbest og marmari í jörðu.

Loftslagið er að mestu heitt og þurrt.  Loftrakinn með ströndum fram er samt mikill.  Meðalárshiti er 28,3°C.  Meðalársúrkoman er víðast minni en 102 mm.

Íbúarnir voru tæplega 2,2 miljónir árið 1996 (10 manns á hvern km²).  Höfuðborg landsins er Masqat (áætlaður íbúafjöldi 1993 550 þúsund).  Tvíburaborg hennar, Matrah, er mikilvæg hafnarborg.  Meðallífslíkur við fæðingu árið 1995 voru 68 ár fyrir karla og 72 ár fyrir konur.  Íbúarnir eru að langmestu arabar og í minnihlutahópum eru Indverjar, Austur-Afríkumenn og aðrir erlendir farandverkamenn í aðalhafnarbæjunum.

Tunga og trúarbrögð.  Arabíska er opinbert tungumál í landinu.  Meirihluti íbúanna eru ibadhi-múslimar en hinn aðaltrúarhópurinn er sunni-múslimar.

Menntun er frí í landinu, þótt skyldunám sé ekki til.  Á áttunda og níunda áratugnum tók menntakerfið stórstígum framförum og á miðjum tíunda áratugnum stunduðu 470 þúsund nemenda 900 skóla.  Mikil áherzla er lögð á að útrýma ólæsi.  Háskóli Qabus soldáns í grennd við Masqat var stofnaður 1986.  Árið 1995 stunduðu þar 4.296 stúdentar nám.