*Swayambhunath-stúpan trónir á litlum hóli norðvestan miðborgar Kathmandu.  Hún er einhvert fegursta mannvirki landsins og hugsanlega eitt hinna elztu Buddhamustera þess.  Það liggja 365 þrep upp í stúpuna, en það er ganga, sem borgar sig, því að útsýnið yfir borgina og dalinn er frábært.

Á leiðinni til Swayambhunath er upplagt að heimsækja Þjóðminjasafnið og skoða m.a. höggmyndir, bronzmuni og leðurfallbyssu, sem var notuð í tíbezk-nepalska stríðinu árið 1880.

Balaju-vatnagarðarnir eru skammt norðvestan borgarinnar.  Þar er gaman að virða fyrir sér vatnsspúandi drekahausa við 46 m langa, manngerða tjörn og skoða sædýrasafnið.

Budhanilkantha er lítið þorp við rætur Shipapuri (10 km norðan borgarinnar).  Þar er manngerð tjörn með höggmynd af Narayan (Vishnu), sem liggur í rúmi gerðu úr miðgarðsormi.

*Boudhnath-stúpan (8 km norðaustan höfuðborgarinnar) er næstmesti helgidómur Buddhamanna.  Þorpið umhverfis hana myndaðist og stækkar við að  tíbezkir kaupmenn og munkar setjast þar að.  Þar eru nokkur klaustur og fjöldi minjagripaverzlana.

Sundarijal er vinsæll ferðamannastaður nokkrum km norðan Boud-hnath en þar eru fallegir fossar og fjallasalur.

Bhadgaon (Bhaktapur; 16 km austan Kathmandu) er þekkt fyrir vefnað og leirmunagerð.  Borgin var stofnuð árið 889 e.Kr.  *Durban-torgið býr yfir fegurstu byggingum Newari-stílsins í öllum dalnum.  Höllin með gluggunum 55 er meistaraverk.  *Gullna hliðið að aðalgarði hallarinnar er eitt fegursta og ríkulegast skreytta hlið heims (guðamyndir og kynjadýr).

Umhverfis torgið eru eftirtalin mannvirki skoðunarverð:  Pashu-patinath-pagódan, sem var byggð með samnefndan helgidóm við Bagmati-ána sem fyrirmynd;  Batsala- og Bhawani-musterin.  Skammt frá torginu er Nyatapola-pagódan.  Hún er fimm hæða og hin hæsta í Kathmandu-dalnum.  Bhairavnath-musterið var reist á árunum 1708-1718 (Raja Bhupatindra Malla).  Bronsstytta þess stendur á og prýðir Durbartorgið.  Dattatreya-musterið (15. öld), í austurhluta borgarinnar, dregur til sín pílagríma frá allri Suður-Asíu.

Fjórum km norðan Bhadgaon er Changu-Narayan-musterið á hól.  Það er elzti helgidómur Kathmandu-dalsins í pagódustíl.  Nokkrar áletranir inni í því eru allt frá 5. öld.  Nagarkot (2300 m) er 15 km frá Bhadgaon (stuttur akstur eða 3 klst. ganga).  Þetta þorp er einhver fegursti staður dalsins.  Þaðan er u.þ.b. 20 mínútna gangur upp að frábærum **útsýnisstað.  Þar blasa við tindar Himalajafjalla, jafnvel Mount Everest í austurátt.  Fólk, sem vill dvelja um hríð í þorpinu, fær þægilega gistingu í Taragaon Nagarkot Resort.

Patan (Lalitpur; 5 km suðaustan Kathmandu) er þriðja mikilvægasta borgin í dalnum.  Þar er fjöldi helgidóma hindúa og Buddhamanna með fögrum högg-myndum og tréskurði.  Nokkur þessara mustera eru við Durbar-torg og um-hverfis gömlu hallarbyggingarnar, þar sem Malla-konungar sátu.

Hiranya Varma Mahaviher (13. öld), Búddaklaustrið, er eitt áhugaverðasta mannvirki borgarinnar.

Kumbheshore-musterið (14. öld), fimm hæða pagóda, og Jagat-Narayan musterið er skoðunarvert.

Krishnamusterið.  Veggir þess eru þaktir gömlum indverskum söguljóðum um Ramayana og Mahabharata.

Machhendranath- (13. öld) og Mahaboudha-musterin (14. öld) auk Ashoka-stúpurnar fjögurra eru líka áhugaverðir skoðunarstaðir.  Stúpurnar voru reistar til minningar um pílagrímsferð indverska keisarans Ashoka árið 249 f.Kr.

Þorpið *Godavari er heimsóknar virði vegna þess, hve það er fagurlega í sveit sett.  Þaðan er tiltölulega skammt að fjallinu Phul Chowki.  Gangan upp á hæsta tind þess (3000m) tekur u.þ.b. 3 klst. og á leiðinni gefur að sjá sjaldgæf og litrík blóm, fjölda tegunda fiðrilda og rhododendron-runna í öllum litum regnbogans.

Skoðunarferðir frá Kathmandu til Kirtipur og Chovar eru líka áhugaverðar.

Kirtipur er fallegt þorp með gömlum húsum og þröngum götum.  Þar er aðalsetur eina háskólans í Nepal.  Þorpið er einkum þekkt sem vefarabærinn og þar klæðist fólkið oft gömlum, hefðbundum fötum.

Chovar er þekkt fyrir Bagmati-gjána.  Þjóðsagan segir að guðinn Manjushri hafi skapað hana til að vatnið, sem fyllti Kathmandu-dalinn, fengi afrennsli og hyrfi.  Ofan af hóli, þar sem Adinath-musterið stendur, er mjög gott útsýni.

Vilji fólk sjá meira af landslaginu, er upplagt að aka 6 km lengra um skógi vaxið svæði til Pharping og Dakshinkali.  Í báðum þessum þorpum eru ævagömul musteri.

Útsýni yfir **Himalajafjöllin er einna bezt frá þorpunum Kakani (27 km norðvestan Kathmandu; 2000m) og Dhulikel (30 km austan Kathmandu).  Frá Dhulikel sjást Himalajafjöll frá Annapurna (8091m) í vestri til Lhotse (8511m) og Makalu (8481m) í austri.