Kota Kinabalu er höfuðborg Sabah, hét Jesseltown til 1963.  Þar búa 120.000 manns.  Borgin var jöfnuð við jörðu í síðari heimsstyrjöldinni til að Japanar gætu ekki notað hana sem bækistöð.  Þess vegna er hún nútímaleg og skortir hana hina sögulegu töfra, sem Kuching í Sarawak hefur.  Hvað sem því líður er borgin græn og þægileg og loftslagið við sjávarsíðuna notalegt.

Þjóðarmoskan, *Masjid Sabah, setur svip sinn á borgina og við Jalan Gaya er lítið þjóðminjasafn.  Sunnan flugvallarins teygist hin fallega, 5 km langa strönd *Tanjong Aru.

Fisk- og grænmetis- og ávaxtamarkaðirnir eru niðri við höfn en í næsta nágrenni er filipíski markaðurinn, þar sem seldar eru filipískar handiðnaðarvörur.

Kinabalufjall er norðaustan Kota Kinabalu í 60 km fjarlægð í loftlínu.  Hæsti hluti fjallsins er í 4.011 m hæð yfir sjó.  Það er hæsta fjall Malasíu og reyndar allrar Sa-Asíu.  Kadazan ættflokkurinn lítur á fjallið sem dvalarstað brottkallaðra sálna ættingja sinna og tignar það sem slíkt.  Svæðið umhverfis fjallið er nú þjóðgarður.  Þar vaxa rúmlega 800 tegundir orkidea og dýra- og fuglalíf er mjög skrautlegt.

Fjallgangan hefst við aðalbækistöðvar þjóðgarðsins.  Hún krefst ekki mikillar reynslu í fjallamennsku, miklu fremur góðs úthalds, hlýs fatnaðar, vettlinga og góðs fótabúnaðar.  Gistimöguleikar á leiðinni upp eru fáir og fábreyttir en gista verður eina nótt á leiðinni upp.  Hægt er að leigja svefnpoka á gististaðnum, þannig að ekki þarf að burðast með slíkt.  Krafizt er M$ 10.- fyrir leyfi til fjallgöngunnar.  Göngumenn eru skyldaðir til að taka með sér innlendan leiðsögumann en margir koma sér hjá því.  Leiðsögumaður kostar M$ 25.- á dag fyrir 1-3 þátttakendur, M$ 28.- fyrir sex og M$ 30.- fyrir átta, sem er hámarksfjöldi.  Sofið er í 3.300 m hæð nóttina fyrir síðari hlutann.  Lagt er af stað í bítið til að vera kominn upp á tindinn áður en skýin hylja sýn um miðjan morgun.  Gangan niður að aðalbækistöðvunum tekur það, sem eftir lifir dags.

Gistiaðstaðan og matsalan í aðalstöðvum þjóðgarðsins er ágæt og velskipulögð.  Þaðan er frábært útsýni til Mt. Kinabalu, þegar skýin hylja ekki sýn.

Merktir göngustígar liggja frá bækistöðinni að hinum 300 m háa fossi Kambarangoh, að Kiau-gjánni og að hverunum við Poring (43 km).  Á hverjum degi kl. 11:15 er farið í skipulagðar gönguferðir um þjóðgarðinn.

Skógarmenn (orangutan) lifa þarna í skóginum.