Bekaadalurinn (Al-Biqa) er í Líbanon.  Hann er 112 km langur og allt að 26 km breiður, 30 km austan Beirút.  Þessi dalur er norðaustasti armur Sigdalsins mikla, sem teygist suður um Rauðahaf inn í Afríku.  Meðfram honum eru Líbanonsfjallgarðurinn að vestanverðu og Anti-Líbanon fjallgarðurinn að austanverðu.  Þarna ríkir Miðjarðarhafsloftslag með mildum og rökum vetrum og þurrum og heitum sumrum.  Hann er í regnskugga Líbanonsfjalla, sem veldur takmarkaðri úrkomu, einkum í norðurhluta hans, þar sem meðalársúrkoman er aðeins 230 mm en 610 mm um miðbikið.  Tvær ár spretta upp í dalnum, Orontes-áin, sem streymir til norðurs og Litani-áin til suðurs.  Zahla er aðalborgin, rétt norðan aðalveginum milli Beirút og Damaskus.  Íbúar hennar eru aðallega kristið fólk (rómversk katólskt, marónítar og rétttrúaðir) en í sveitunum umhverfis hana búa shíta-múslimar (einkum að norðanverðu).

Á rómverskum tímum var Bekaadalurinn matarforðabúr skattlandsins Sýrlands.  Þar eru nú u.þ.b. 40% ræktanlegs lands í Líbanon.  Hirðingjar með kvikfé sitt halda sig norðurenda hans, þar sem minnst rignir og jarðvegur er ófrjósamastur.  Sunnar er ræktað hveiti, maís, baðmull og grænmeti og umhverfis Zahla ávextir og vínviður.  Þarna er líka ræktað mikið af hassi og ræktun ópíumvalmúa fer vaxandi.  Áveituframkvæmdir við Litani-ána (Qirawn) hafa bætt ræktunarskilyrði í sunnanverðum dalnum.

Baalbek er merkasti sögustaðurinn í Dalnum.  Þar eru miklar, rómverskar rústir hofa Venus og Júppíters o.fl.  Baalbek-hátíðin, sem laðaði að listamenn úr öllum heimshornum, var löngum haldin á þessu rústasvæði.  Þessi borg hefur verið aðalmiðstöð herflokks guðs (Shíta-Hezbollah), sem Íranar styrkja.  Sýrlenzkir herflokkar hafa verið í dalnum síðan borgarastyrjöldin í Líbanon brauzt út árið 1975.  Árið 1982 reyndi flugher Ísraela án árangurs að hrekja Sýrlendinga úr dalnum með því að gera árásir á loftvarnarflaugar þeirra.