Cali er höfuðborg Valle del Cauca-héraðs í Vestur-Kólumbíu á báðum bökkum Cali-árinnar í 1014 m hæð yfir sjó.  Hún er í jaðri hitabeltisins í Cauca-dalnum suðvesturhluta landsins og var stofnuð 25. júlí 1536.  Þar var að verki Sebastián de Belalcázar.  Cali fór ekki að vaxa og dafna að ráði fyrr en á sjötta áratugi 20. aldar vegna samgönguleysis.  Hún er nú þriðja stærsta borga landsins á eftir Bogotá og Medellín.

Fyrirtækið CVC (Cauca Valley Corporation) hóf starfsemi í dalnum árið 1954 og fljótlega lifnaði yfir landbúnaði og iðnaði.  Fyrirtækið stíflaði Efri-Cauca-ána til raforkuframleiðslu, til að draga úr flóðahættu og áveitna þar sem áður var varla hægt að draga fram lífið með jarðrækt.  Það stóð líka fyrir vélvæðingu í landbúnaðnum.  Cali er aðalmiðstöð dreifingar afurða dalsins og iðnaðurinn er kominn á svipað stig og í borgunum Bogotá, Barranquilla og Medellín.  Meðal þess, sem er ræktað í ábataskyni í dalnum er sykurreyr og kaffi og nýlega bættust við baðmull og soyjabaunir.  Nautgriparækt er mikilvæg vegna mjólkur- og kjötframleiðslu og mikið er ræktað af kjúklingum.  Pappír (úr sykurreyr), lyf og efnavara eru meðal mikilvægrar framleiðslu borgarinnar.

Cali hefur verið mikilvæg miðstöð fyrir flutning og dreifingu í u.þ.b. fjórar aldir og er í járnbrauta- og vegasambandi við allar helztu borgir í norðausturhlutanum og við Kyrrahaf.  Þar er alþjóðaflugvöllur og herflugvöllur.  Borgin er vinsæll ferðamannastaður og laðar æ fleiri gesti að sér á uppskerutíma sykurreyrsins og kjötkveðjuhátíðina.  Meðal menningar- og menntastofnana eru Forngripasafnið, Trúarlega listasafnið, Borgarleikhúsið, Tónlistarhöllin, Menningarhöllin o.fl.  Vesturheimsíþróttaleikarnir, sem eru haldnir á fjögurra ára fresti, voru haldnir þar 1971.  Áætlaður íbúafjöldi 1985 var rúmlega 1,3 milljónir.