Futshou (Fuzhou, Foochow), höfuðborg strandhéraðsins Fujian (Fukien), sem er oft kallað 'Landslagsgarður Kína', er við ána Min (Min Jiang) ofan ósa hennar við Austur-Kínahaf.  Utan ósanna er eyjan Matsu, sem Lýðveldið Kína á Taiwan ræður.  Þessi hafnarborg hefur ævinlega verið mikil viðskiptaborg.  Á 13. öld skýrði Marco Polo frá ýmsum tengslum sínum þar.  Eftir undirritun Nankingsamningsins árið 1842 varð Fuzhou brezk höfn, einkum fyrir teútflutning.  Margir heimfluttir kínverjar hafa setzt að í borginni.

Auk nokkura helgidóma borgarinnar er gaman að skoða 'Trumbufjall' (Gu Shan; 670 m; austan borgarinnar), hofið Yong Quan Si frá 908, marga laufskála, garða o.fl. Kanton (Canton, Guangzhou; 5 millj. íb.), höfuðborg héraðsins Guangdong (Kwantung) og andleg og viðskiptaleg höfuðborg Suður-Kína, er við frjósama óshólma Perluár (Zhu Jiang), eitthvert stærsta ræktunarsvæði hrísgrjóna í landinu.  Kanton er kölluð 'Suðurhlið Kína'.  Hún er mikilvægasta  utanríkisviðskiptahöfnin, mikil iðnaðarborg og samgöngumiðstöð (endastöð margra járnbrauta, m.a. til Hongkong; alþjóðaflugvöllur).  Hún er fremri Shanghai, hvað viðskipti snertir.  Tvisvar á ári (vor og haust) er haldin stór og mikil vörusýning (útflutningsvörur).

Borgin býr yfir suður-kínverskum lífskrafti og iðni, þótt líka sé hægt að finna þar ró og djúphygli utan skarkalans í lystigörðunum.

Í norðausturhlutanum er lystigarðurinn Yuexiu Shan, í norðvesturhlut-anum er Liu Hua með fallegu vatni.  Í vesturhlutanum er vatnið Liwan í vinalegu umhverfi, í austurhlutanum er lystigarðurinn Don Shan.

Meðal skoðunarverðra, sögulegra bygginga eru Liurong Si (Hof banyan-trjánna sex), moskan Huaisheng Si (627) og fimm hæða pagódan Zhenhai Lou (laufskáli með útsýni yfir vatnið; upprunalega frá 1380, endurbyggð eftir bruna 1686; þar er borgarsafn Kanton.

Grafhýsi píslarvottanna 72 frá 1911, minningarhöll fórnarlamba uppreisnarinnar í Kanton 1927 og minningarhöll Sun Yat-sen, stofnanda fyrsta kínverska lýðveldisins, frá 1931 minna á atriði úr nýlegri sögu landsins.

Rómversk-katólska dómkirkjan (1888) er ein stærsta kirkjan í Kína.  Dýragarðurinn og grasagarðurinn eru skoðunarverðir.

Frá Bai Yuan Shan (Fjalli hvíta skýsins; 382m), sem er hæsti staður borgarinnar, er mjög gott útsýni.  Litla eyjan Sha Mian í Perlufljóti var eitt sinn undir brezkum og frönskum yfirráðum.  Þar í grenndinni er áhugaverður frímarkaður.

Foshan (Fushan) er 25 km suðvestan Kanton.  Borgin er kunn fyrir Shivanleirmunagerð og pappírsklippimuni.  Þar er líka athyglisvert taó-musteri helgað forfeðrunum frá dögum Song-höfðingjaættarinnar.

Heilsubótarbærinn Conghua er 75 km norðaustan Kanton.  Heitu laugarnar (Conghua Wenquan) þar eru allt að 71°C heitar.