Rúmlega 500 km í loftlínu vestan Konton er iðnaðarborgin Nanning (500þ.íb.) í frjósömu landbúnaðarhéraði (sykurreyr, hrísgrjón) við járnbrautina til Vietnam.  Hún er höfuðborg sjálfstjórnarhéraðsins Guangxi (Kwangsi), þar sem Zhuang-kínverjar búa.  Borgin varð illa úti í menningarbyltingunni síðla á sjöunda áratugi 20. aldar.

Héraðssafnið, Stofnun þjóðarbrotanna, Grasagarðurinn (hollustujurtir) o.fl. staðir eru skoðunarverðir.  borgin er þekkt fyrir óperuna og leikbrúðuhefð sína.  Hvert sumar eru haldnar róðrarkeppnir í drekabátum á Yong Jiang-fljóti, sem Mao Tseötung synti yfir árið 1958 og myndir birtust af í heimspressunni.

Þorpið Yiling, 20 km norðvestan Nanning, er þekkt fyrir allt að 45 m djúpa dropasteinahella, sem eru upplýstir í mörgum litum.  Þessir hellar voru skjól íbúanna á stríðstímum, einkum á meðan Japanar hersátu landið.  Gönguleiðin um hellana er 1 km löng og það tekur 1-1½ klst. að skoða þá með hléi á miðri leið (hlý föt).

Gamla borgin Guilin (Kweilin; 300.000 íb.) er 350 km (loftlína) norð-austan Nanning.  Hún stendur á vesturbakka árinnar Li (Li Jiang).  Gestir sækja þangað helzt vegna hins töfrandi **landslags.  Óteljandi furðuklettar og karsttindar rísa stakir upp úr grænu og gráu ævintýralandslagi.  Þeir hafa öldum saman laðað að sér listamenn og skipað þessu landsvæði meðal hinna allrafegurstu í Kína.  Í karstmyndununum er fjöldi stórkostlegra dropasteina-hella.  Bezt er að skoða þessi undur í skoðunarferðum með rútum eða fara í *bátsferð niður Li Jiang til Yangshuo (80 km).

Kommúnistar lögðu hana undir sig síðasta allra borga á meginlandi Kína árið 1949 og hún varð illa úti vegna ýmissa afbrota í menningarbyltingunni.  Skoðunarverðir staðir í borginni sjálfri eru Vötnin Rong Hu (Banyanvatn) og Song Hu (Furuvatn), Sjöstjörnugarðurinn Qizing Gongyuan, Fílsrana-fjall (Xiang Bi Shan), Kamelfjall (Luo Tuo Shan) og fallegi dropasteinahellir-inn Ludi Yan (Rörflautuhellir).  Mörg hús í hefðbundnum kínverskum stíl prýða borgina, þ.á.m. elliheimili fyrir grænmetisætur Göngunnar löngu.  Við þröngar hliðargötur aðalgatnanna eru alls konar steinmyndanir og handmálaðar sólhlífar falboðnar.