Miðkínverska héraðið Henan, oft nefnt silkihéraðið, er mjög þéttbýlt og frjósamt vegna framburðar Gulafljóts (Huang He, Hwangho), sem liðast í gegnum það frá vestri til austurs.  Helztu landbúnaðarafurðirnar eru korn, hrísgrjón, baðmull og tóbak.

Zhengzhou (Tshengtshou, Chengchow; 1,6 millj. íb.) hefur verið höfuðborg héraðsins síðan 1954.  Hún er sunnan Gulafljóts (Hwangho) og er ein elzta borg Kína.  Forleifarannsóknir sýna, að þarna var byggð þegar árið 2100 f.Kr.  Borgin hefur verið mikilvæg járnbrautamiðstöð milli Shanghai, Chengdu og Beijing í áratugi.  Því var mikið um verkföll þar á þriðja áratugnum, sem léttu kommúnistum leiðina til valda.

Mælt er með heimsókn í Sögusafn Henanhéraðs.

Luoyang (Lojang; 700.000 íb.), rúmlega 120 km vestan Zhengzhou, er gömul og virðuleg borg, sem ber líka sæmdarheitið:  „Vagga kínverskrar menningar".  Þarna bjó fólk þegar á yngri steinöld (neolithicum; 6000 f.Kr.) en Chou-höfðingjaættin kom henni á landakortið með því að velja hana sem höfuðborg sína eftir 770 f.Kr. Luoyang var höfuðborg á valdatímum Han- (25-225 e.Kr.), Wei-, Kin- og Suiættanna en deildi hlutverkinu á Tangtímanum (618-907).  Á valdadögum ættanna fimm (907-960) missti borgin forystuna.

*Í hinni gömlu og hrífandi miðborg Luoyang eru enn þá falleg hús frá Yuan-, Ming- og Qingtímunum.  Í Wangcheng Gong Yuan (Lystigarði konungsborgarinnar) eru tvær Hangrafir með málverkum frá elzta skeiði ættarinnar.  Fleiri staðir eru skoðunarverðir:  Chiyun-pagódan og Borgarsafnið í Guandi Miao (Hofi stríðsguðsins; Ming).  Í nýrri borgarhlutanum býr og starfar íbúarnir, sem hefur fjölgað mjög og stöðugt.

Iðnfyrirtæki eru mörg í borginni, s.s. dráttarvéla- (hin fyrsta í Kína) og kúluleguverksmiðja.

Baima Si (Hof hvítu hestanna) er 10 km austan Luoyang.  Það var stofnað árið 68 f.Kr. (endurnýjað á 15. öld) og er því elzta búddaklaustur landsins.

Hinir manngerðu *Drekahliðshellar (Long Men Shi Ku; 5.-8. öld) eru 15 km sunnan Luoyang ofan við vesturbakka árinnar Yihe.  Þarna voru 1350 hellar, mörg hundruð skot og pagódur höggnar í bergið og þar eru mörg þúsund búddalíkneski, lágmyndir og áletranir.  Því miður hafa listaverkaþjófar látið þar greipar sópa síðustu tvær aldirnar og „graffítistar" spillt staðnum.

Skammt frá Gongxian, 65 km austan Luoyang, eru átta keisaragrafir Songættarinnar og Gongxianhellarnir frá tíma Weiættarinnar við rætur Dali Shan.

Í umhverfi sýsluborgarinnar Dengfeng, 80 km suðaustan Luoyang, eru margir skoðunarverðir staðir:

15 km í norðvestri er hið heimsfræga hofklaustur *Shaolin Si (frá 5.öld; oft endurnýjað).  Munkarnir eru þekktir fyrir að æfa sig í bardagaíþróttinni Gongfu (Kung-Fu).

5 km í austri er taóhofið Zhongye Miao frá Tang-tímanum (núverandi útlit er frá Qingtímanum).  Það er stærsta hofið í Henanhéraði.

15 km í suðaustri er elzta *stjörnuathugunarstöð landsins frá Yuantímanum (13./14. öld).