Mustique er 6 km² og íbúafjöldinn er 500.  Hún er 25 km sunnan St. Vincent.  Síðan 1959 hefur hún verið í eigu skozka milljónamæringsins Colin Tennant og er eftirsóttur sumardvalarstaður ríka og fræga fólksins.  Þar eiga m.a. bústaði Margrét prinsessa (Villa „Les Jolies Eaux") og Mick Jagger.  Nýverið hefur eyjan verið opnuð ferðamönnum með minni buddur.  Þeir, sem koma með snekkjum sækja einkum Basil's barinn á Cotton House hótelinu og Charlie's Guesthouse.  Boðnar eru orlofsíbúðir með allri þjónustu gegn háu verði.

Reglulegar flugsamgöngur milli Mustique og St. Vincent, Canouan, Union Island Carriacou og Martinique.  Ferjur sigla oft í viku milli Mustique og St. Vincent, Bequia, Carriacou og Union Island.

Aðalþorpin á eyjunni eru Lovell's Village og Dover's Village á vesturströndinni.  Alls staðar með ströndum fram eru frábærar baðstrendur í skjólsælum víkum og úti fyrir eru kóralrif og smá-eyjar.

Úti fyrir norðurströndinni liggur flak franska skemmtiferðaskipsins Antilles.  Það strandaði á kóralskeri í janúar 1971 og brann.  Eyjarskeggjar björguðu bæði áhöfn og farþegum.

*Petit Mustique er 107 m há smáeyja 2 km sunnan Mustique.  Hún er vinsæl meðal siglingafólks.

Savan Islands eru kyrrlátar smáeyjar girtar kóralskerjum 8 km sunnan Mustique.

Baliceaux Island og Battowia Island eru draumaeyjar 7 km norðan Mustique.  Þangað sækir fjöldi ferðamanna, bæði siglingafólk og aðrir.