San Andrés er 13 km löng og allt að 3 km breið.  Hún er aðaleyjan.  Eyjan er flatlend og hækkar upp í 150 m.y.s. í norðvesturhlutanum.  Fallegar baðstrendurnar eru í skjóli smáeyja og kóralrifja.  Pálmar, bananatré og sums staðar mangrovetré prýða landslagsmyndina.

Höfuðstaður eyjanna er á austurströndinni.  Þar er fjörugt viðskiptalíf á tollfrjálsu svæði.  Í bænum eru vinaleg timburhús, nokkur hótel og fjöldi verzlana.  Helzti skoðunarstaður utan bæjarins er Morganhellirinn, kalkhellir, þar sem Henry Morgan er sagður hafa fólgið fjársjóði sína.

Einnig er gaman að skoða strompa kalkhellanna Boiling Holes eða Hoyo Sublador, sem sjórinn spýtist upp um eins og úr gosbrunnum í miklum sjógangi.

Allt í kringum eyjuna eru baðstrendur og aðstæður til sjóstangaveiði, köfunar og brimbrettareiðar.