Georgetown er Höfuðborg krúnunýlendunnar á sunnanverðu Vesturlandinu við Hog Sty Bay (Svínastíuflóa).  Við höfnina eru nokkrar gamlar byggingar og í sumum þeirra eru tollfrjálsar verzlanir.  Elmslie Memorial kirkjan, sem byggð var á 19. öld og endurbyggð nýlega, býður af sér góðan þokka.  Í grennd við hana eru fátæklegar rústir Georgvirkis sem gert var á 17. og 18. öld.  Það var reist til varnar gegn Spánverjum og sjóræningjum.  Inni í borginni vekjur fjöldi nútíma skrifstofubyggingar athygli.  Þar eiga aðsetur lögfræðingar og fulltrúar mörg hundruð erlendra banka og tryggingarfyrirtækja.  Á milli Panton Avenue og Edwardstrætis er nýja dómshúsið og norðan við það er þinghúsið og ráðhúsið auk tveggja nútíma bygginga, þar sem stendur stytta af Georg III, Englandskonungi.  Suðaustan borgarinnar er stjórnarhúsið (1975) og aðar stjórnsýslubyggingar.

SKOÐUNARVERÐIR STAÐIR
Half Way Pond.  U.þ.b. 2 km austan George Town, handan Half Way Pond, er Owen Roberts flugvöllurinn.  Við suðausturenda hans er „Hitabeltisgarðurinn", þar sem athyglisverðar plöntur eru ræktaðar.  Aðeins norðar eru rústir fyrrum eldisstöðvar sjávarskjaldbaka.

*Sjömílnaströnd.  Norðan George Town er hin 10 km langa Sjömílnaströnd, sem löngum var talin hin fegursta baðströnd Karíbahafsins.  Nú eru þar fjölmörg hótel, fjölbýlishús og einbýlishús og þar býr ríkisstjóri eyjanna.  Þar er og ný og nýtízkuleg ráðstefnumiðstöð.

Botabano.  Norðvestast við Norðurflóa.  Þar hefjast bátsferðir að kóralrifjunum, sem loka flóanum hér um bil í norður.

West Bay.  Næst stærsti bær Grand Cayman, rétt fyrir norðan Sjömílnaströnd.

Skjaldbökustöðin.  Rétt norðan við West Bay.  Þar eru ræktaðar u.þ.b. 65.000 sjávarskjaldbökur í stórum tönkum unz þær ná ákveðnum aldri.  Þá er þeim slátrað og þær fullnýttar.  Upphaflega var þetta bara klakstöð eggja, sem var safnað á ströndum Surinam, Costa Rica og á Ascensióneyjum.  Tilraunir til ræktunar tókust 1973, þegar fyrsta skjaldbakan verpti eggjum í stöðinni.  Þar með varð stöðin óháð mótmælum WWF (World Wildlife Fund) gegn innflutningi eggja.  Árið 1978 flutti fyrirtækið út vörur (kjöt, leður, skeljar og snyrtivörur) fyrir meira en 2 milljónir US $.  Eldisstöðin hefur mikilvægasta útflutingsatvinnuveg eyjanna með höndum.

Víti (Hell) er landsvæði austan skjaldbökustöðvarinnar.  Það dregur nafn sitt af sérkennilegum klettamyndunum.  Þar er pósthús með eigin póststimpli (Hell, Grand Cayman) og „Vítisklúbburinn", veitingastaður, sem þekktur er fyrir málshætti og skrítin orðatiltæki.

Coconut Walk Bay er baðströnd á suðvesturhorninu, sem stór viti gnæfir yfir.
Suðurflói (South Sound).  Þar er góð baðströnd austan Coconut Walk Bay.  Kóralrifin mynda gott skjól og við vesturenda strandarinnar er skipsflak.

Prospect Point - Fort Prospect.  Aðeins austar á höfðanum Prospect Point er minnismerki um William Bodden (1776-1823), sem byggði virkið Fort Prospect, sem er nú rústir einar.  Þaðan var eyjunni stjórnað um hríð.

Prospect Beach er í beinu framhaldi af höfðanum til austurs. Á kóralrifinu undan ströndinni er enn eitt skipsflakið.

Prospect Park.  Gömlu grafirnar við veginn eru áhugaverðar.  Norðan þjóðvegarins er nýtt íbúðahverfi með sama nafni.  Norðar við Norðurflóa, er afþreyingarsvæði fyrir þá, sem vilja stunda vatnaíþróttir, Omega Gardens.

Spotts Bay.  Enn austar í skjóli kóralrifja með High Bluff, sem er klettabelti.  Athyglisverðir eru leðurblökuströndin og -hellarnir, þar sem eru enn þá náttúruleg heimkynni leðurblakanna.  Matilda Ponds eru skammt norðan við með fjölda sjaldgæfra fuglategunda.

Savannah er bær enn austar.  Skammt suðaustan hans er elzta mannvirki eyjanna, Péturskastali umvafinn ævintýraljóma.  Hann var líklega byggður af spænskum innflytjenda í kringum 1635 og styrktur og uppbyggður af Englendingum 1780.

Bodden Bay og Bodden Town.  Austan Savannah (5 km) er Boddenflói í rifjaskjóli.  Sjóræningjar voru tíðir gestir í Boddenbæ.  Þar er fallbyssa á Byssutorgi (Gun Square), sem notuð var við varnir á 18. öld.  U-laga borgarmúr liggur 6 km inn á eyjuna.

Breakers.  U.þ.b. 5 km austar handan Meagre Bay Pond er litla þorpið Breakers, þar sem er frægur klúbbur, „Vitaklúbburinn" (Lighthouse Club) og enn austar er Frankflói með fallegum baðströndum.