* Piazza Erbe er stórt torg í miðborginni (ávaxta- og grænmetismarkaður).  Það er eitt fegursta torg Ítalíu.  Á því miðju er Capitello, hásætishiminn á súlum, sem fyrrum var notaður við val yfirmanna borgarinnar.  Norðar er

Markaðsbrunnurinn (1368) með að hluta til fornri marmarastyttu af „Madonna Verona”.

Marmarasúlan við norðurenda torgsins stendur undir Markúsarljóninu, sem var kennimerki feneyskra yfirráða.  Í norðausturhorninu er

Casa Mazzanti, sem upprunalega ein bygginga Skagleriættarinnar, með freskum frá endurreisnartímanum. Við norðurhlið torgsins er barokbyggingin
Palazzo Mafféi frá 1668 og vinstra megin við höllina er

Torre del Gardello, reist 1370.

Casa dei Mercanti á horni Via Pellicciai var endurreist með hliðsjón af húsi, sem þar var byggt 1301.  Andspænis því er hinn 83 m hái

Borgarturn, Torre del Comune (lyfta; útsýnisstaður).  Stutta gatan vinstra megin opnast í austur á

* Palazzo della Ragione, ráðhúsið, sem byrjað var að byggja 1193, og síðar var haldið áfram með.  Það er mjög illa byggt.  Forhliðin í endurreisnarstíl er frá 1524.  Í garðinum er frístandandi trappa (1446-50), sem  liggur að innganginum í borgarturninn.  Við hliðina er

Dómshúsið, sem var Palazzo del Capitanio, ein halla Skagleriættarinnar (1530-31) með endurreisnarskrauthliði eftir Michele Sanmicheli.  Við austanvert torgið er

Palazzo del Governo, upprunalega Skaglerihöll, sem var breytt á 16. öld (skrauthlið eftir Michele Sanmicheli frá 1532).  Við norðanvert torgið er

* Loggia del Consiglio, héraðsstjórabústaðurinn, er eitt fegursta verk frumendurreisnartímans (1486-93) eftir Giovanni og Bartolomeus Sanmicheli.  Það prýða styttur frægra íbúa Verona í fornöld.  Gangurinn milli bústaðarins og dómshúss- ins liggur að kirkjunni Santa Maria Antica með rómönskum klukkuturni.  Þar standa hin stórkostlegu, gotnesku *grafsteinar Skagleriættarinnar.  Umhverfis þau eru listilega skreyttar járngirðingar, þar sem mikið ber á tröppum (scala), sem voru skjaldarmerki Skagleriættarinnar.  Skammt norðar, við enda Corso Sant' Anastasia, niðri við ána Etsch (Adigo) er

Sant' Anastasia, Dominikanakirkjan (1290-1323 og 1422-81) úr múrsteini og mjög skrautleg að innan (altöru frá 15. - 18. öld).  Norðvestan hennar er

Dómkirkjan í rómöskum stíl frá 12. öld.  Langhúsið er gotneskt frá 15. öld.  Við hlið hennar er klukkuturn í rómönskum stíl frá 1927, sem Sammicheli teiknaði.  Við skrautlegar aðaldyrnar eru tvær riddaraveggstyttur af Karli mikla (Roland og Olivier), meðal hinna fyrstu sinnar tegundar (1139-53).  Fyrsta altari t.v. sýnir himnaför Maríu eftir Tizian (1525).  Við enda hægra hliðarskipsins er gotneskt minnismerki heilagrar Agöthu (1353) í ramma í endurreisnarstíl.  Vinstra megin við kirkjuna  eru rómönsk krossgöng (1123) með mósaíkskreyttum göngustíg í gamalkristnum stíl.

Sé haldið yfir Garibaldibrúna og gegnum San Giorgiohliðið er komið að

* San Giorgio in Braida kirkjunni (16. öld) með fallegum kúplum og altarismyndum í stíl við stefnu skólanna í Verona og Brescia.  Myndin yfir háaltarinu sýnir píslarvætti heilags Georgs og er eitt meistaraverka Paolo Veronese.

** Hringleikahúsið (Arena) var reist u.þ.b. 290 e.Kr. á tímum Diokletians.  Það er eitt stærsta mannvirki sinnar tegundar, sem notað var fyrir bardagamenn (gladiatora) og dýraat.  Það er þekkt úr þýzkri hetjusögu sem „Hús Dietrichs von Bern”.  Á yzta veggnum norðanverðum hafa aðeins fjórar bogaraðir varðveitzt, en þriðji hringur hefur tvöfaldar bogaraðir.  Að innanverðu eru 43 þrep, sem rúma 22.000 áhorfendur (bezt útsýn frá efstu röð).  Hringleikahúsið er sporöskjulagað með 152 m lengdarás og hæðin var 32 m.  Í júlí og ágúst ár hvert eru færðar upp frægar óperur.  Verk Shakespears eru færð upp í Theatro Romano.  Svið Rómeo og Júlíu er í Verona.  Þarna hefur Krisján Jóhannsson, stórsöngvari, sungið mjög oft.

* San Zeno Maggiore kirkjan (11. og 12. öld) er e.t.v. merkust rómanskra bygginga N-Ítalíu.  Klukkuturninn var byggður á árunum 1045-1178 og varðturninn á 14. öld. fyrir þáverandi Benidiktinaklaustur.  Við aðaldyrnar eru rómanskar veggmyndir úr biblíunni og af öðrum vettvangi.  Inni í kirkjunni er einstök tréhvelfing frá 14. öld og freskur frá 12. - 14. öld skreyta hliðarskipin.  Í kórnum er marmarastytta heilags Zeno frá 13. öld.  Zeno var biskup í Verona, sem dó 380 e.Kr.  Yfir altarinu er mynd af Guðsmóður með dýrlingum eftir Mantegna 1456-59.  Við norðanvert kirkjuskipið tengist kirkjan við rómönsk-gotnesk krossgöng.