Qom er borg við Qom-ána.  Hún er samgöngumiðstöð í landbúnaðarhéraði (korn, baðmull, ávextir, hnetur og valmúi).  Þar er iðnaður tengdur vefnaði, skógerð, leirmunagerð og glergerð.  Qom er ein hinna heilögu borga landsins.  Þar er 9. aldar gullhvelfdur helgidómur Fatímu, systur imamsins Reza.  Þúsundir shíta-múslima heimsækja hann ár hvert.  Þarna liggja margir konungar Safavid-fjölskyldunnar í grafhvelfingum sínum og fornir borgarmúrar prýða borgina.  Markaðir eru víða og áhugavert ríkissafn. 

Qom var stofnuð á 9. öld og var lögð í eyði, þegar mongólski sigurvegarinn, Tamerlane fór þarna um eins og logi um akur á 14. öld og þegar Afghanar gerðu innrás á 18. öld.  Hún var höfuðborg Qom-héraðs til 1938.  Iðnþróun varð aðallega á fjórða áratugi 20. aldar.  Nafn borgarinnar er einnig stafað Qum, Kum eða Kom.  Áætlaður íbúafjöldi árið 1991 var tæplega 700 þúsund.

Fatíma (606-632) var ein dætra Muhammads, sem hann átti með fyrstu og uppáhaldskonu sinni, Khadija.  Hún giftist Ali ibn Abi Talib, fyrsta frænda Muhammads í föðurætt.  Hún ól honum tvo syni, Hasan og Husain.  Hún og Ali eru því ættforeldrar ímama shíta-múslima og allra þeirra, sem telja sig afkomendur spámannsins, hvort sem þeir eru sunni- eða shíta-múslimar.  Ismaili-kalífaættin (909-1171) í Norður-Afríku og Egyptalandi tóku upp nafnið Fatímítar til að leggja áherzlu á framættir sínar og rétt sinn til embættis ímama shíta.

Fatíma nýtur mikillar virðingar meðal langflestra múslima.  Shíta-múslimar sýna henni mesta lotningu og telja hana búna ofurmannlegum hæfileikum (óskeikula).  Í bókmenntum shíta er hún oft borin saman við guðsmóður í kristinni trú.  Fæðingardagur hennar og giftingardagur eru meðal merkra daga í lífi hennar, sem shítar halda upp á.