Hormuzsund tengir Persaflóa í vestri við Ómanflóa og Arabíuhaf í austri.  Sundið skilur Arabíuskaga frá Íran.  Það er 275 km langt og 50-80 km breitt.  Hernaðarlegt mikilvægi þess er mikið vegna hinna miklu olíuflutninga, sem fara um það.  Í sundinu eru íranska eyjan Quishm og eyjarnar þrjár, Stóra-Tunb, Litla-Tunb og Abu Musa, sem Íran náði á sitt vald 1971 og Sameinuðu arabísku furstadæmin gera kröfu til.