Bangkaeyja (11.515 km²; 627.000 íb. 1990) er í Javahafi í Indónesíu suðaustan Súmötru.  Milli hennar og Súmötru er mjótt Bangkasundið.  Pangkalpinang er stærsta borgin og Muntok er aðalhafnarborgin.  Allt frá árinu 1710 hefur Bangka verið meðal aðaltinframleiðenda heims.  Ríkið rekur tinnámurnar og tinbræðsluna í Muntok.  Talsvert er framleitt af pipar.  Flestir íbúanna eru kínverjar, sem starfa í tinnámunum.  Soldáninn í Palembang léði Bretum yfirráðin yfir eyjunni 1812 en tveimur árum síðar tóku Hollendingar við yfirráðunum í skiptum fyrir Cochin í Indlandi.  Japanar hernámu eyjuna á árunum 1942-45.  Árið 1949 varð eyjan hluti af sjálfstæðri Indónesíu.