Samkvæmt stjórnarskránni hefur landið verið sjálfstætt lýðveldi með þrískiptingu valdsins frá því að það fékk sjálfstæði 1821.  Stjórnarskránni var breytt 17 sinnum frá 1821 til 1982.  Völdin í landinu hafa oft skipt um hendur á ólýðræðislegan og hátt með ofbeldi og byltingum.  Þótt þingið hafi löggjafarvaldið, er það í höndum forsetans og framkvæmdavaldsins.  Þingið á lögum samkvæmt að hafa eftirlit með framkvæmdavaldinu og forsetanum en þessi lög virkuðu aðeins á tímabilinu 1925-31, þegar þingið lýsti vantrausti á nokkra ráðherra, sem forsetinn skipaði og þeir urðu að segja af sér.

Forsetinn, sem er æðsti embættismaður ríkisins, er kosinn í almennum kosningum til fjögurra ára í senn.  Þingið starfar í einni deild (134) og þingmenn eru kjörnir til fjögurra ára.  Helztu stjórnmálaflokkar landsins eru Frjálslyndi flokkurinn (Partido Liberal de Honduras) og Þjóðarflokkurinn (Partido Nacional).  Allir borgarar eldri en 18 ára hafa kosningarétt.

Landinu er skipt í 18 héruð og yfir þeim sitja landstjórar, sem forsetinn skipar.  Héruðunum er síðan skipt í sveitarfélög og þeim í þorp og bæi (aldeas) og síðast í röðinni eru byggðir (caseríos).  Forsetinn skipar hæstaréttardómara.  Hæstiréttur sér um lægri dómstigin og skipar héraðsdómara og hefur líka stöðu stjórnlagadómstóls.