Rotterdam er hafnarborg við ána Maas í héraðinu Suður-Holland, ófjarri Den Haag.  Hún fékk borgarréttindi 1328 og óx upp í að verða einhver stærsta hafnarborg heims.  Hún er tengd Rín og er aðalmiðstöð hafskipaflutninga til og frá landinu og Ruhr-héraðinu í Þýzkalandi.  Hafskipaskurðurinn var opnaður umferð árið 1872 (byggður 1866-1890) til að hafskip gætu lestað og affermt þar.  Þessi skurður og gífurleg auking viðskipta ollu mikilli uppsveiflu á síðasta hluta 19. aldar.  Risastór hafnaraðstaða, Europoort, var byggð við vesturenda skurðarins á sjöunda áratugi 20. aldar, einkum fyrir losun risaolíuskipa.  Önnur hafnaraðstaða og stærstu iðnfyrirtækin (olíuhreinsun, skipasmíði, efna-, málm- og sykurverksmiðurI eru á suðurbakka árinnar Maas.  Helztu útflutningsvörurnar eru kol, vélabúnaður og mjólkurvörur og innflutningurinn byggist aðallega á olíu, málmgrýti og korni.

Mestur hluti gömlu Rotterdam og höfnin var í rústum eftir sprengjuárásirnar í síðari heimsstyrjöldinni og úr þeim reis velskipulögð nútímaborg.  Aðalíbúðar- og verzlunarhverfin eru á norðurbakkanum.  Vestan Coolsingel, aðalskurðarins, er rúmgott verzlunarhverfi (Lijnbaan), sem er einungis ætlað gangandi vegfarendum.  Hið fræga Boymans-van-Beuningen-safn (1847) er í borginni auk Erasmusháskólans, sem var stofnaður 1973.  Í Blijdorp-dýragarðinum er fjölbreyttasta safn paradísarfugla í heimi.