Fontainebleau er í 60 km fjarlægð í suðausturátt frá París.  Þar búa u.þ.b. 20.000 sálir í bæ, samnefndum höllinni frægu.

Versalir eru stór og glæsileg höll en Fontainebleau er heillandi konungshöll, umgirt fögrum veiðiskógi.  Hinn 20. apríl 1814 gekk Napóleon Bonaparte niður skeifulaga tröppurnar og kvaddi gamla lífvörðinn sinn áður en hann var sendur í útlegðina til Elbu.  Fontainebleau var uppáhaldshöll hans.  Þar hafa búið margir konungar, drottningar og frillur, sem sett hafa mark sitt á höllina.

Fyrstu heimildir frá 12. öld geta um litla höll í Fontainebleau, sem lúðvík 7. notaði.  Frans I lét stækka hana í endurreisnarstíl og réði til þess fjölda lista- og handverksmanna frá Ítalíu.  Primaticcio og Rosso sáu um verkstjórn og skreytingar.  Eftirmaður Frans I stækkaði höllina enn þá meira. Lúðvík 14 dvaldi oft í Fontainebleau hjá frillu sinni, Louise de la Valliére.  Hann breytti höllinni lítið, þar eð hann var of upptekinn af Versölum, en lét þó Le Nôtre skipuleggja hluta hallargarðsins.

Höllin slapp vel frá stjórnarbyltingunni árið 1789, þótt flestir innanstokksmunir hyrfu.  Empirehúsgögnin, sem eru í Fontainebleu núna, eru frá tíma Napóleons Bonaparte.  Í eikar- og beykiskógunum umhverfis höllina eru klettagil, mýrar, auðnir, hvítfyssandi ár og smáfjöll, þar sem fjallagarpar æfa sig.  Hægt að ganga þar um hringveg.