Landslag.  Hæðaröð liggur yfir aðaleyjarnar tvær norðanverðar og nær 705 m hæð yfir sjó, þar sem heitir Mount Usborne á Austur-Falklandi.  Með ströndum fram eru margir sokknir dalir, sem mynda skjólgóðar hafnir.  Litlar árnar renna um víða dali með þykkum mólögum.  Svalt og vindasamt loftslagið sveiflast lítið í hitafari, sem er nokkuð jafnt allt árið, og lítill munur er á árstíðum.  Meðalvindhraðinn á eyjunum er 31 km/klst. og ársmeðalhitinn er u.þ.b. 5°C (líkt og á Íslandi) og mestur meðalhiti er 9°C (lægri en á Íslandi) og minnsti meðalhiti er 3°C (meiri en á Íslandi).  Meðalúrkoma ársins er 635 mm (minni en í Rvík).

Gróður eyjanna er lágvaxinn og þéttvaxinn í nokkurn veginn trjálausu landslagi.  Hvítgresi (cortaderia pilosa) og empetrum rubrum eru ráðandi tegundir á graslendi, og þar sem gætt hefur verið hófs í beitarnýtingu á aðliggjandi eyjum, vex enn þá brúskgresi (parodiochloa flabellate).  Svalt og rakt loftslagið kemur í veg fyrir algera rotnun gróðurs og myndar þykk mólög, sem eru uppspretta eldsneytis á eyjunum.

Dýralíf.  Eftir að refurinn dó út á eyjunum eru engin villt landspendýr eftir.  Alls verpa u.þ.b. 65 tegundir fugla á eyjunum, s.s. svartbrýndi albatrossinn, falklandtittlingurinn, peregrinefálki og milljónir mörgæsa, aðallega „rockhopper-”, Magellan-, gentoo-, kónga- og macaronimörgæsir.  Í hafinu umhverfis eyjarnar syndir fjöldi höfrunga og hnýsa.  Sæljón og sæfílar eru algengir víðast hvar og loðselir finnast á fáum og afskekktum stöðum.