Verg þjóðarframleiðsla á árunum 1992-94 var US$ 291 miljón (US$ 800.- á mann).  Gjaldmiðill landsins er Salómoneyjadalur (100 sent).  Aðeins 1% landsins er ræktanlegur en landbúnaður, skógarhögg og fiskveiðar eru aðalatvinnuvegirnir.  Aðalframleiðsluvörurnar eru kókoskjarnar, kókosolía, kakó og pálmakjarnar.  Helztu landbúnaðarafurðirnar eru kókoshnetur, kassava, kartöflur, taro, hrísgrjón, ananas og bananar.  Skógarhögg og timburvinnsla eru mikilvægur atvinnuvegur en ofnýting skóga landsins eru áhyggjuefni.  Trochus-skeljar eru mikið nýttar til hnappa- og skartgripagerðar. 

Miklar birgðir báxíts og fosfats hafa fundizt í jörðu og lítið eitt af gulli úr ánum á Guadalcanal er unnið.  Landinu er stjórnað samkvæmt stjórnarskránni frá 1978.  Fulltrúi brezku krúnunnar er landstjóri, sem verður að vera ríkisborgari Salómonseyja.  Þingið starfar í einni deild (47).

Sagan.  Líklega voru Salómonseyjar byggðar fyrir 4000 árum (Melanesar).  Árið 1568 kom spænski sæfarinn Álvaro de Mendana de Neyra til eyjanna og gaf þeim núverandi nafn.  Louis Antoine de Bougainville kannaði norðureyjarnar 1768.  Eyjan, sem var nefnd eftir honum tilheyrir nú Papúa Nýju-Gíneu.  Árið 1885 náðu Þjóðverjar yfirráðum yfir norðureyjunum en árið 1900 fengu Bretar yfirráðin yfir öllum eyjunum nema Bougainville og Buka.  Bretar höfðu lýst eyjarnar verndarsvæði sitt árið 1893.

Í upphafi síðari heimsstyrjaldarinnar lögðu Ástralar undir sig restina af Þýzku-Salómonseyjum og árið 1919 fól Þjóðabandalagið Áströlum stjórn þeirra.  Japanar hernámu flestar eyjanna í síðari heimsstyrjöldinni og miklar orrustur voru háðar á svæðinu, einkum á og umhverfis Guadalcanal áður en Bandaríkjamönnum tókst að gjörsigra Japana og reka hina síðustu brott 1945.  Árið 1975 fengu Suður-Salómonseyjar og aðrar umhverfis sjálfstæði sem hlutar Papúa Nýju-Gíneu.  Brezku-Salómonseyjar fengu sjálfstæði 7. júlí 1978.  Fyrsti forsætisráðherra eyjanna var Peter Kenilorae.  Eftirmaður hans var Solomon Mamaloni 1981.  Francis Billy Hilly varð forsætisráðherra 1993 en næsta ár tók Solomon Mamaloni við eftir miklar deilur um skógarhögg og timburvinnslu.