Dunedin er hafnarborg í Otagonhéraði á suðausturhluta Suðureyjar við Otagohöfn, sem er 23 km löng og hafskipahöfnina Chalmers yzt.

Skozka fríkirkjan stofnaði borgina 1848 á þessum slóðum vegna góðs aðgangs að timbri og vænleg svæði til landbúnaðar.  Hún var kölluð Dunedin, sem er gelíska nafnið á Edinborg (Duneideann).  Gullfundur í Otago 1861 olli blómaskeiði og miklu aðstreymi fólks og gerði hana að mikilvægustu borg landsins á síðari hluta 19. aldar.  Hun var kauptún 1855 en varð að borg 1865.
Þrátt fyrir hægfara vöxt eftir síðari heimsstyrjöldina, er borgin mikilvæg miðstöð iðnaðar.  Verksmiðjurnar framleiða ullarvörur, vefnaðarvörur, heimilistæki, fótabúnað, húsgögn, sápu, áburð og efnavörur og hveiti.  Þarna eru hveitimyllur, slippir, verkfræðistofur og járn- og málmsteypur.  Dunedin er tengd þjóðvega- og járnbrautakerfinu til Christchurch 337 km norðar og flugsamgöngum.

Dunedin er einnig kunn fyrir 200 ha skógarbeltið, sem stofnendur borgarinnar skipulögðu umhverfis miðborgina.  Grasagarðurinn og listasafnið eru áhugaverðir staðir.  Otago-háskólinn er hinn elzti á Nýja-Sjálandi (1869).  Þarna eru líka Otago-safnið og Landnemasafnið.  Borgin er miðstöð katólsku- og ensku biskupakirjunnar og þar eru guðfræðiskólarnir Knox, Selwyn og Heilagskross-menntaskólinn.  Áætlaður íbúafjöldi 1991 var tæplega 117 þúsund.