Kosrae er eyríki í Bandaríkjum Míkrónesíu í Karólínueyjaklasanum í Vestur-Kyrrahafi.  Eyjan er austust eyja í klasanum og hæðótt eldfjallaeyja í kringum 109 km² að flatarmáli.  Meðal þess, sem eyjaskeggjar rækta eru taro, glóaldin, brauðávextir og bananar.  Eyjan var undir stjórn Japana frá lokum fyrri heimsstyrjaldarinnar og rammlega varin í hinni síðari.  Bandaríkjamenn gerðu stórárásir á eyjuna og náðu henni undir sig 1945, þegar Japanar gáfust upp.  Árið 1947 urðu Karólínueyjar að bandarísku verndarsvæði á vegum Sameinuðu þjóðanna og 1979 varð Kosrae hluti að Bandaríkjum Míkrónesíu.  Áætlaður íbúafjöldi árið 1988 var 6500.