Manchester er stjórnsýslumiðstöð héraðsins Stór-Manchester í norðvesturhluta Englands við árnar Irwell, Medlock, Irk og Tib.  Hún er mikil iðnaðarborg og var löngum leiðandi í vefnaðariðnaði landsins auk þess að vera mikilvæg hafnarborg, sem tengist Manchester-skipaskurðinum (opnaður 1894) til Eastham við Mersey-ána, þannig að hafskip komast til borgarinnar.  Fjölbreyttur framleiðsla verksmiðja borgarinnar nær til pappírs, lyfja, raftækja, tækja í flugvélar, tolva og matvæla.  Borgin er í grennd við kolanámur, sem voru mun Meira nýttar fyrir 1960.

Meðal menntastofnana borgarinnar eru Viktoríuháskóli (1903), Konunglegi tónlistarskólinn (1923) og fjöllistaskóli.  Borgin státar af mörgum menningarstofnunum, s.s. John Rylands-bókasafninu, Hallé-hljómsveitinni (1857) og borgarlistasöfnunum (1823), þar sem eru forleifa- og náttúrugripasöfn auk tækni- og vísindasafna.  Manchester er setur biskups ensku kirkjunnar og dómkirkjan er frá 15. öld.

Á fyrstu öld e.Kr. stofnuðu Rómverjar útvarðstöðina Mancunium á núverandi borgarstæði.  Miðaldaborgin var líklega stofnuð á 10. öld og árið 1301 fékk hún viðurkenningu sem sjálfstæð borg.  Þá þegar var ullariðnaðurinn í miklum vexti.  Á 17. öld var Manchester blómstrandi miðstöð viðskipta og baðmullar- og vefnaðariðnaður jókst.  Þegar gufuvélar voru teknar í notkun í baðmullariðnaðnum 1783 jókst vöxtur borgarinnar sem aldrei fyrr.  Árið 1830 komust á járnbrautarsamgöngur við höfnina í Liverpool.

Í ágúst 1819 urðu blóðug átök milli 60.000 mótmælenda kornlaganna og fótgönguliða borgarinnar á St Peter’s-völlum, svokölluð Peterloo fjöldamorðin, þar sem 11 mótmælendur féllu.  Alla 19. öldina voru íbúar borgarinnar virkir í pólitískri baráttu fyrir umbótum í menntamálum.  Borgin varð mistöð útgáfustarfsemi.  Hið frjálslynda dagblað, Guardian, var stofnað þar 1821 sem Manchester Guardian.

Allt frá miðri 19. öld dró úr vefnaðariðnaðnum og nýjar greinar iðnaðar hafa tekið við.  Borgin skemmdist verulega í loftárásum Þjóðverja í síðari heimsstyrjöldinni en var endurbyggð.  Robert Peel forsætisráðherra og rithöfundurinn Thomas De Quincey fæddust báðir í borginni.  Áætlaður íbúafjöldi árið 1991 var rúmlega 430 þúsund.