|
 Vatnasvið. Lempaáin er hin stærri tveggja aðal vatnakerfa landsins.
Hún á upptök sín í Gvatemala og rennur yfir norðvesturlandamærin
til austurs (130 km) og myndar hluta landamæranna við Hondúras.
Síðan sveigir hún til suðurs, 105 km leið um Miðhásléttuna
til Kyrrahafs. Hún var
skipgeng nokkra kílómetra áður en tvö stór raforkuver voru byggð
um miðbik hennar (Cerron Grande og 1. nóvember stíflan).
Í austurhlutanum er Rio Grande de San Miguel.
Nokkrar smáár renna beint til sjávar frá miðhálendinu.
Loftslagið
einkennist af hitabeltinu en er mismunandi eftir hæð yfir sjó og meðalhiti
15-23°C. Mikið rignir frá
maí til október (temporales) og þurrast er aðra mánuði ársins.
Á láglendinu við Kyrrahafið má reikna með 25-29°C.
Í San Salvador (711m) er hámarkshiti 34°C í marz en lágmarkshiti
í janúar 16°C. Í fjöllunum
ofar 1450 m er hitinn 17-22°C og meðalúrkoma við sjávarsíðuna er
1700 mm. Í suður- og norðurfjalllendinu milli 600 og 1000 m yfir sjó
er úrkoman milli 1800 og 2500 mm.
Gróðurfar. Hátt uppi í fjöllum eru strjál graslendi og leifar eikar-
og greniskóga. Á Miðhásléttunum
og í dölunum eru lágvaxin lauftré, runnar og jaðartrópísk
graslendi. Í hlíðum
strandfjallanna og láglendisins eru steppur og laufskógar.
Talsvert vex af balsatrjám, sem gefa af sér verðmætan við og
efni til lyfjagerðar. Aðrar
verðmætar trjátegundir eru sedrustré, mahónitré, lárviðartré,
nisperotré og madrecacaotré, sem eru notuð til húsgagnagerðar.
Maquilishuattréð, sem er þjóðartré landsins, er sérdeilis
fallegt. Á strandsvæðunum
vaxa allmargar tegundir pálma og fjöldi tegunda hitabeltisávaxta,
s.s. kókoshnetur, tamarind, melónur og mango.
Izoteplantan er þjóðarblómið.
Dýralíf. Vegna þess, hve mikið land hefur verið brotið til ræktunar,
er fjöldi villtra dýrategunda takmarkaðri í El Salvador en öðrum
Mið-Ameríkuríkjum. Nóg
er af nagdýrum, skriðdýrum og skordýrum og fuglafánan er allfjölbreytt,
endur, hvíthegrar, konungshegrar, bláskjór og urraca, sem gefur frá
sér hljóð, sem líkjast hæðnishlátri, og fjöldi annarra litskrúðugra
tegunda. Í ám og vötnum er fjöldi fiskategunda, skjaldbökur og krókódílar. |
