Valparaíso er höfuðborg samnefnds héraðs í Mið-Síle við stórar og breiðan flóa, 140 km norðvestan Santiago.  Borgin er í hlíðum hálfhringlaga strandfjallanna, sem enda á stórgrýttum Angeles-skaganum.  Hann veitir gott skjól gegn sunnan- og vestanáttum.  Sigurvegarinn Juan de Saavedra stofnaði borgina 1536 og nefndi hana eftir fæðingarstað sínum á Spáni.  Þar standa fá hús frá nýlendutímanum vegna árása sjóræningja, fárviðra, eldsvoða og jarðskjálfta.  Mestur hluti borgarinnar var endurbyggður eftir mjög harðan jarðskjálfta 1906 og mikið tjón varð í jarðskjálftum 1971.  Eftir að Síle fékk sjálfstæði 1818 og einokunarverzlun Spánverja var aflétt, þróaðist höfnin samhliða stofnun og rekstri sjóhersins og auknum gufuskipasamgöngum við Evrópu.  Borgin hefur löngum verið meðal stærstu borga landsins en um miðjan og síðari hluta 20. aldar fjölgaði íbúum hægt og fækkaði jafnvel um tíma.

Viðskiptahverfi borgarinnar með hafnarmannvirkjum, vöruhúsum, bönkum og verzlunargötum er á landfyllingu út í flóann og sömu sögu er að segja um stjórnsýslubyggingar í kringum Sotomayor-torgið.  Dómkirkjan, garðar, breiðgötur, leikhús, kaffihús og nokkrar nýlendubyggingar (La Matriz-kirkjan) eru í þessum lægri hluta borgarinnar.  Herskóli sjóhersins og íbúðahverfi hans eru í bröttum hlíðum og dölum hæðanna í kring og efst eru fátækrahverfin.  Kapalbrautir, lyftur, tröppur og hlykkjóttar götur liggja á milli neðri og efri hluta borgarinnar.  Nærliggjandi ferðamannastaður, Vina del Mar, varð smám saman að einu íbúðarhverfi borgarinnar.

Þing landsins, sem starfar í tveimur deildum, hefur komið saman í Valparíso síðan það var stofnað 1990 en engu að síður er borgin fyrst og fremst miðstöð viðskipta og iðnaðar.  Þar eru málmbræðslur og efnaverksmiðjur, framleiðsla vefnaðarvöru, sykurs, málningar, fatnaðar, leðurvöru og grænmetisolíu.  Í nágrannabænum Concón er olíuhreinsunarstöð.  Mestur hluti innflutnings landsmanna fer um höfnina í Valparíso.  Þótt aðeins lítill hluti útflutnings landsins fari um höfnina, er höfnin mjög mikilvæg fyrir samgöngur á sjó og þangað sækir fjöldi skipa stórra skipafélaga árið um kring.

Valparíso er miðstöð menningar og setur Tækniháskóla Federico Santa María (1926), Katólska háskólans (1928) og náttúrugripasafns og listasafns borgarinnar.

Ríkisjárnbrautirnar tengja Valparíso við Santiago og allar aðrar mikilvægar borgir og hafnir frá Pisagua til Puerto Montt.  Góðar hraðbrautir liggja til ferðamannabæjanna í norðri og suðri og til Santiago.  Önnur hraðbraut liggur yfir Andesfjöllin til Mendoza í Argentínu.  Borgin er einnig tengd innanlandsfluginu.  Áætlaður íbúafjöldi 1995 var tæplega 300 þúsund.