Sao Francisco-fljótið er í Austur-Brasilíu og jafnframt hið stærsta, sem er að öllu leyti innan landamæranna.  Það á upptök sín í Minas Gerais, þaðan sem það rennur til norðurs, norðausturs og suðurs til Atlantshafs.  Neðri hluti árinnar skilur að fylkin Bahia og Sergipe annars vegar og Pernambuco og Alagoas hins vegar.  Áin er u.þ.b. 3000 km löng og vatnasviðið nær yfir 551.410 km².  Hún er skipgeng um miðjuna, alls1368 km vegalengd en þrjár hindranir eru í henni neðanverðri, þ.e. flúðir við Pirapóra, við landamæri Bahia-fylkis og granítgljúfrin í strandfjöllunum.  Áin rennur út í Atlantshafið norðaustan Aracaju og meðalvatnsmagn er u.þ.b. 29.000 m³/sek.

TAPAJÓS-FLJÓTIÐ er í Mið-Brasilíu og ein þveráa Amasónfljótsins.  Það á upptök sín á landamærum fylkjanna Amazonas, Pará og Mato Grosso, þar sem Teles Pires og Juruena-árnar koma saman.  Tapajós rennur u.þ.b. 1770 km í norðurátt og hverfur til Amasónfljóts við Santarém.  Skipgengur hluti þess er u.þ.b. 280 km langur.

TOCANTINS-FLJÓTIÐ  á upptök sín í miðju fylkinu Gojás við samruna tveggja vatnsfalla.  Það stefnir norður um Pará-fylkið og þegar það hefur lagt 2735 km að baki, breikkar það og verður að Pará-ánni, sem rennur út í óshólma Amasónfljóts sunnanverða.  Aðalþveráin er Araguaia, sem sameinast Tacantins-fljóti nyrzt í Gojás.

XINGU-FLJÓTIÐ er í Norðvestur-Brasilíu.  Það verður til úr þremur ám á norðurhluta hásléttu Mato Grosso.  Það er u.þ.b. 1980 km langt og streymir norður í gegnum fylkin Mato Grosso og Pará, alla leið til óshólma Amasónfljótsins.  Miðhluti fljótsins er ekki skipgegnur vegna fjölda fossa og flúða en hægt er að sigla u.þ.b. 100 km upp eftir henni frá ósunum.