Belo Horizonte er höfuðborg Minas Gerais-fylkis.  Hún er miðstöð iðnaðar, menningar og lista í stóru námuhéraði, sem er auðugt af járngrýti, gulli, magnesíum, nickel og eðalsteinum.  Iðnaðurinn byggist á vinnslu járns, stáls, vefnaðarvöru og flutningatækja.  Borgina prýða trjáskreytt breiðstræti, sem geisla út frá stórum skemmtigarði.

Þar er einhver stærsti knattspyrnuleikvangur í heimi, fylkisháskólinn (1927), katólski háskólinn (1958) og listaháskóli (1954).  Nýleg kirkja, Sao Francisco, sem Oscar Niemeyer Soares Filho hannaði, er í Pampulha-hverfinu.  Í henni eru málverk brasilíska listamannsins Cándido Portinari.

Borgin var stofnuð 1895 og tók við hlutverki Ouro Preto sem höfuðborg fylkisins árið 1897.  Hún er fyrsta skipulagða borg Brasilíu og varð fljótt mikilvæg miðstöð efnahagslífsins í upplöndum landsins.  Stór íbúða- og iðnaðarhverfi voru skipulögð og byggð á fimmta áratugi 20. aldar.  Áætlaður íbúafjöldi árið 1993 var rúmlega tvær milljónir.