Belém (Pará) er höfuðborg Paráfylkis og aðalhafnarborgin við neðanvert Amasónfljót, nánar tiltekið við ármót þess og Pará-árinnar rétt við miðbaug.  Höfnin er aðgengileg hafskipum og þar er flotastöð sjóhersins.  Portúgalar stofnuðu borgina 1615 og blómaskeið hennar hófst á 19. öld, þegar Amasónsvæðið varð smám saman mikilvægara fyrir utanríkisverzlun landsins.  Helztu útflutningsvörurnar eru hrágúmmí, hnetur, kakó, böstungur og timbur.  Sögunarmyllur, vélaverkstæði, skipasmíðastöðvar og verksmiðjur, sem framleiða múrsteina, flísar og sápu, eru áberandi í borginni.

Belém er meðal áhugaverðustu borga Suður-Ameríku.  Þar er fjöldi torga og fallegar götu, sem teygjast víða alla leið að skógarjaðrinum.  Hún er miðstöð menningar og menntunar í Norður-Brasilíu.  Þar eru m.a. Pará-háskóli (1957) og Goeldisafnið, sem gefur góða mynd af lífríki og mannfræði Amasónsvæðisins.  Belém hefur verið setur katólskra biskupa síðan 1723.  Áætlaður íbúafjöldi borgarinnar 1993 var 1,3 milljónir.
Mynd:  Lýðveldistorgið og óperan.