Frægustu hátíðarhöldin í Brasilíu eru hin fjögurra daga kjötkveðjuhátíð, sem er haldin í Rio de Janeiro fyrir föstuna ár hvert.  Þessi hátíð er byggð á katólskum hefðum og hátíðarsiðum afkomenda afrískra þræla og hefur skotið djúpum og varanlegum rótum í þjóðfélaginu.  Slíkar hátíðir hafa aðallega þróazt á þéttbýlissvæðum í grennd við fyrrum plantekrur á strandlengjunni milli Recife og Rio de Janeiro.  Sambaskólarnir í Rio de Janeiro eru afsprengi þessara hátíða og þar er mikill tími lagður í undirbúning hátíðanna, sem eru mjög skrautlegar.

Fjöldi annarra hátíða, bæði opinberar og kirkjulegar, eru haldnar á hverju ári, þ.m.t. þjóðhátíðin 7. september og dagur heilags Johns í júní (brennur, flugeldar og loftbelgir).  Afrískra áhrifa gætir í hátíð gyðju hafsins, lemanjá, í strandhéruðunum.  Á nýársdag er almennur frídagur.  Þá halda skip úr höfn með fórnir, sem eiga að tryggja góðan afla á nýja árinu.

Stéttaskiptingar gætir ekki við hátíðarhöld, á knattspyrnuleikjum og á sólarströndum landsins.  Þar hittist ungt folk og tekur þátt í alls konar afþreyingarleikjum á ströndinni.  Knattspyrnar er þjóðaríþrótt landsmanna, sem á sér ófáa aðdáendur.  Ungir og gamlir taka þátt í henni, bæði beint og óbeint, og Brasilíumenn eru duglegir að halda forystu í henni eins og sést á ítrekaðri þátttöku þeirra í heimsmeistarakeppninni, þar sem þeir eru oftar en ekki í fremstu röð.  Einn fremstu knattspyrnumanna heims, Pelé, lék fyrir Brasilíu árum saman.  Fjöldi skemmtigarða í og utan borganna laðar til sín fjölskyldur og aðra hópa, sem vilja njóta félagsskapar í fallegu umhverfi.

Þjóðgarðar eru víðast í nágrenni þéttbýlis og bjóða gestum fagurt og afslappandi umhverfi.  Afskekktari friðlýst svæði og þjóðgarðar eru aðallega meðfram þverám Amasónfljóts, þar sem ástæða er til að vernda lífríkið, þ.á.m. byggðir indíána.  Slík svæði eru ekki ætluð fjöldaferðamennsku.  Mörk þjóðgarða og friðlýstra svæða voru færð til fyrir þjóðvegi og önnur mannvirki fram til 1960, þegar yfirvöld fóru að sýna nauðsyn þeirra meiri skilning og stofnuðu Náttúruverndarráð.  Meðal vinsælustu þjóðgarða landsins eru Itatiaia, Iguacu og Serra dos Orgaos.

Fjölmiðlar.  O Estado de Sao Paulo og Folha de Sao Paulo eru aðaldagblöð landsins, bæði gefin út í Sao Paulo.  Jornal do Brasil, O Globo og O Dia eru gefin út í Rio de Janeiro og fjöldinn allur af öðrum dagblöðum er gefinn út í minni borgum.  Talsverður fjöldi vikublaða, s.s. Visao og Manchete, eru líka á markaðnum.  Blaðaútgáfan er nátengd ljósvakafjölmiðlum, s.s. TV Manchete- og TV Globo-sjónvarpsstöðvarnar, sem eru ásamt Rádio Globo öflugustu fjölmiðlar landsins.  Fjöldi annarra fjölmiðla starfar út um allt land.  Fræðslufjölmiðlar eru að mestu takmarkaðir við stærstu þéttbýlin.  Meðal vinsælasta sjónvarpsefnisins eru sápuóperur, íþróttaþættir, fréttaþættir, erlendar kvikmyndir með portúgölsku tali og barnatímar.  Sjónvarpið í landinu hefur aukið skilning og umburðarlyndi meðal hinna mismunandi þjóðerna og dregið úr spennu á milli þeirra.